سندھ حکومت نے اسمبلیاں توڑ نے سے متعلق وفاقی حکومت کی پیروی کرنے سے انکار کردیا ہے۔ سندھ اسمبلی 11 اگست کو تحلیل ہوگی۔
سندھ حکومت نے اسمبلیاں توڑ نے سے متعلق وفاقی حکومت کی پیروی کرنے سے انکار کردیا اس ضمن میں وزیراعلیٰ سندھ مراد علی شاہ نے وزیر اعظم شہباز شریف کو آگاہ کیا ہے کہ سندھ اسمبلی 9 اگست کو تحلیل نہیں کی جائے گی۔
اس ضمن میں سیکریٹری سندھ اسمبلی کی جانب سے صوبائی اسمبلی کا شیڈول بھی جاری کردیا گیا ہے، شیڈول کے مطابق 9 اگست کو یونیورسٹی اور بورڈ سے متعلق وقفہ سوالات ہو گا جب کہ 10 اگست کو لائیو اسٹاک اینڈ فشریز متعلق وقفہ سوالات ہوگا۔
یوں سرکاری طور پر 11 اگست سندھ کی منتخب صوبائی حکومت کا آخری دن ہوگا تاہم اس آخری روز بھی سندھ اسمبلی کے اجلاس میں انسانی حقوق سے متعلق وقفہ سوالات ہو گا ۔
سیکریٹری سندھ اسمبلی کے دستخط سے تمام شیڈول کی کاپیاں اراکین اسمبلی کو تقسیم کردی گئی ہیں جس پر ’ٹاپ پرائیورٹی اسمبلی بزنس‘ تحریر ہے۔
