ویرات کوہلی سوشل میڈیا سائیٹ انسٹاگرام پر تیسرے امیر ترین ایتھلیٹ بن گئے ہیں، کوہلی ایک انسٹاگرام پوسٹ کے ساڑھے 11 کروڑ بھارتی روپے کماتے ہیں۔ معروف پرتگالی فٹبالر کرسٹیانو رونالڈو 59 کروڑ 68 لاکھ 48 ہزار 846 فالوورز کے ساتھ پہلے جبکہ شہرہ آفاق ارجنٹائنی فٹبالر لیونل میسی47 کروڑ 92 لاکھ 68 ہزار 484 فالوورز کے ساتھ دوسرے نمبر پر ہیں۔
سوشل میڈیا مارکیٹنگ سلوشنز پلیٹ فارم ہوپر ایچ کیو کے مطابق ویرات کوہلی انسٹاگرام پر تیسرے امیر ترین ایتھلیٹ ہیں اور ٹاپ 25 میں شامل واحد بھارتی شخصیت ہیں۔ 2023 کی انسٹاگرام رچ لسٹ کے مطابق کوہلی کی فی پوسٹ 13 لاکھ 84 ہزار ڈالر یا 11 کروڑ 45 لاکھ بھارتی روپے کی ہے۔
ہندوستانی اسٹار کرکٹر ویرات کوہلی کے انسٹاگرام فالوورز کی تعداد 25 کروڑ 52 لاکھ 69 ہزار 526 ہے۔ ان کی انسٹاگرام ٹائم لائن پر نظر ڈالی جائے تو ان کی پوسٹس میں بڑے پیمانے پر ان کی مصروفیات ظاہر ہوتی ہیں۔
کوہلی کی انسٹا گرام پوسٹس میں ان کی روزمرہ مصروفیات یعنی سخت ورزش، آرام دہ سفر، اہلیہ اور اداکارہ انوشکا شرما اور بیٹی کے ساتھ تصاویر وغیرہ شامل ہیں۔ واضح رہے کہ ان کی اہلیہ انوشکا شرما کے فالوورز کی تعداد بھی 6 کروڑ 45لاکھ ہے۔
کھیلوں کی دنیا میں کمائی اور بزنس پر نظر رکھنے والی معروف سائیٹ اسپورٹیکو کی حالیہ فہرست میں ویرات کوہلی کو دنیا کے سب سے زیادہ کمانے والے 100 کھلاڑیوں میں بھی شامل کیا گیا ہے اور ان کی کل کمائی 1000 کروڑ روپے سے زیادہ ہے۔
