استحکام پاکستان پارٹی کے پیٹرن انچیف جہانگیر خان ترین کا یومِ آزادی پر پیغام

استحکام پاکستان پارٹی کے پیٹرن انچیف جہانگیر خان ترین نے قوم کے نام اپنے پیغام میں کہاکہ 76ویں یوم آزادی کے پرمسرت موقع پر اپنے ہم وطنوں کی خوشی میں برابر کا شریک ہوں، اور تحریک آزادی کے ان گنت جانثاروں کو خراج عقیدت پیش کرتا ہوں۔

جہانگیر خان ترین نے کہاکہ یوم آزادی پر مقبوضہ جموں و کشمیر میں کشمیریوں سے اظہار یکجہتی کرتے ہیں۔

انہوں نے کہاکہ لاکھوں قربانیوں کے بعد پاکستان حاصل کیا گیا، ہم نے پاکستان کو سیاسی اور اقتصادی لحاظ سے مستحکم اور مضبوط پاکستان بنانا ہے۔

ان کا کہنا ہے کہ تجدید عہد کرتے ہیں کہ پاکستان کو معاشی مشکلات سے نکالنے کے لیے دن رات محنت کریں گے۔

’دیر پا اور عوام دوست پالیسیوں کے ذریعے ملک کو مسائل کے دلدل سے نکالیں گے۔‘

جہانگیر ترین کا کہنا تھاکہ قیام امن کی خاطر جانیں قربان کرنے والے شہداء کی عظیم قربانیوں کو خراج تحسین پیش کرتے ہیں۔