ایران کے صدر ابراہیم رئیسی نے اعلان کیا ہے کہ ایران بیرون ملک واگزار ہونے والے اپنے اثاثوں کو ملکی پیداوار بڑھانے کے لیے استعمال کرے گا۔
برطانوی خبر رساں ادارے کے مطابق گزشتہ ہفتے ایران اور امریکا کے درمیان ایک معاہدہ ہو ا تھا جس کے تحت ایران 5 امریکی شہریوں کو رہا کرے گا جس کے بدلے جنوبی کوریا میں ایران کے منجمند 6 ارب ڈالر کے اثاثوں کو واگزار کر کے قطر کے ایک ایسے اکاؤنٹ میں منتقل کیاجائے گا جس تک ایران بآسانی رسائی حاصل کر سکے گا۔
امریکی حکام نے کہا تھا کہ ایرانی فنڈز کو محدود اکاؤنٹ میں رکھا جائے گا اور اسے خوراک یا ادویات کی خریداری جیسے انسانی مقاصد کے لیے استعمال کیا جاسکے گا۔
ایران نے امریکا کے ساتھ اس معاہدے کے طور پر پہلے قدم اٹھاتے ہوئے حراست میں لیے گئے4امریکی شہریوں کو تہران کی ایون جیل سے گھر میں نظربند کرنے کی اجازت دے دی ہے۔
جب کہ 5 واں شہری پہلے ہی گھر میں نظربند تھا۔ اقوام متحدہ میں ایران کے مشن نے کہا ہے کہ معاہدے کے تحت امریکا کچھ ایرانیوں کو بھی امریکی جیلوں سے رہا کرے گا۔
ایرانی صدر ابراہیم رئیسی نے اپنے اثاثوں کے حوالے سے کہا کہ بیرون ملک سے واگزار کیے گئے اثاثوں کو ایران ملکی پیداوار بڑھانے کے لیے استعمال کرے گا۔
