بھارتی ناظم الامور کو منگل کو وزارت خارجہ میں طلب کیا گیا اور آزاد کشمیر کے ضلع کوٹلی کے گائوں اولی کے رہائشی 60 سالہ شہری غیاث کی بھارتی افواج کی فائرنگ کے نتیجے میں شہادت پر پاکستان کا شدید احتجاج ریکارڈ کرایا گیا۔ یہ واقعہ 21 اگست 2023 کو لائن آف کنٹرول (ایل او سی) کے نکیال سیکٹر میں پیش آیا۔
دفتر خارجہ کی ترجمان کی جانب سے جاری بیان کے مطابق پاکستان نے لائن آف کنٹرول پر امن و آشتی کو برقرار رکھنے کی ضرورت پر زور دیتے ہوئے کہا کہ اس طرح کی کارروائیاں سنہ 2003 کی سیز فائر مفاہمت کی صریح خلاف ورزی ہیں جس کی فروری 2021 میں تجدید کی گئی تھی۔
بیان کے مطابق اس بات پر زور دیا گیا کہ بھارتی افواج کو انتہائی احتیاط برتنی چاہیے کیوں کہ معصوم شہریوں کو نشانہ بنانا انسانی وقار اور بین الاقوامی انسانی حقوق اور انسانی قوانین کے منافی ہے۔ بھارت پر زور دیا گیا کہ وہ واقعے کی تحقیقات کرے اور سیز فائر مفاہمت کا احترام کرے۔
