پاکستان کرکٹ بورڈ (پی سی بی) ملک میں باصلاحیت خواتین کرکٹرز کی تلاش کے لیے گراس روٹ لیول پر ٹرائلز کا انعقاد کررہا ہے جس کے تحت ملک کی مختلف اکیڈیمیز میں ٹرائلز 23 تا 31 اگست منعقد ہوں گے۔
پی سی بی کی جانب سے منگل کو جاری کردہ اعلامیے کے مطابق ٹرائلز مختلف عمر کی خواتین کرکٹرز کو اپنی صلاحیت دکھانے اور آگے بڑھنے کا موقع فراہم کریں گے۔
ٹرائلز کی نگرانی قومی ویمنز سلیکشن کمیٹی کرے گی جس کے سربراہ سابق ٹیسٹ کرکٹر سلیم جعفر ہیں اور اس میں سابق انٹرنیشنل کرکٹرز مرینہ اقبال اور اسماویہ اقبال شامل ہیں۔
ٹرائلز تین کیٹگریز انڈر 19(کھلاڑی کی پیدائش یکم ستمبر2004 یا اس کے بعد کی ہو) ایمرجنگ اور سینئرزمیں ہوں گے۔ ٹرائلز سے سلیکشن کمیٹی کو ٹیلنٹ تلاش کرنے اور پاکستان انڈر 19 اور ایمرجنگ اسکواڈز کے سلیکشن میں مدد ملے گی۔
پاکستان ایمرجنگ ٹیم اکتوبر میں ویسٹ انڈیز ایمرجنگ اور پاکستان انڈر19ٹیم بنگلہ دیش میں جنوری 2024میں انڈر 19کے 3 ملکی ٹورنامنٹ میں حصہ لے گی۔
ویمنز کرکٹ کی ہیڈ تانیہ ملک کا کہنا ہے کہ ہم نے حال ہی میں پہلی مرتبہ 74 خواتین کرکٹرز کے لیے ڈومیسٹک کنٹریکٹس کا اعلان کیا ہے جس نے خواتین کرکٹ کے روشن مستقبل کے ضمن میں ایک شکل واضح کردی ہے۔
تانیہ ملک نے کہا کہ ملک گیر ٹرائلز کے ذریعے ہم نئی باصلاحیت کرکٹرز کو آگے لانے کے لیے کوشاں ہیں اور آنے والے دنوں میں خواتین کرکٹرز کے کئی ایونٹس ہیں اور ان ٹرائلز سے ہمیں بہترین ٹیلنٹ تلاش کرنے میں مدد ملے گی تاکہ سلیکٹرز انہیں قومی اسکواڈز کے لیے زیرغور لاسکیں۔
خواتین کرکٹرز کے ٹرائلز 23 اگست کو حنیف محمد ہائی پرفارمنس سینٹر کراچی اور انضمام الحق ہائی پرفارمنس سینٹر ملتان، 24 اگست کو ویمن سپورٹس سینٹر بہاولپور، کینرڈ کالج فار ویمن لاہور،28 اگست کو کرکٹ اسٹیڈیم راولپنڈی/اسلام آباد ریجنز،29 اگست کوقیوم اسٹیڈیم پشاور،، 30 اگست کو ایبٹ آباد اسٹیڈیم ایبٹ آباد اور 31 اگست کو بگٹی ا سٹیڈیم کوئٹہ میں ہوں گے۔
