سندھ کے ضلع گھوٹکی میں قتل ہونے والے بھائی کی کمسن بیٹی کو بچانے کی اپیل کرنے والے شہری کا کہنا ہے کہ اس کی بھتیجی کو وڈیروں کے ہاتھ لگنے سے بچایا جائے۔
تقریبا 6 منٹ دورانیے کے ویڈیو پیغام میں حکومتی شخصیات اور دیگر کا نام لے لے کر ان سے مدد کی اپیل کرنے والے شخص کا کہنا ہے کہ بھائی بھی میرا قتل ہوا اب میری ہی 12 سالہ بھتیجی کے ساتھ زیادتی بھی ہو رہی ہے۔
میرے والد کو مجبور کیا گیا کہ وہ زمین بیچ کر 10 لاکھ روپے بھی ادا کریں گے اور 12 سالہ بھتیجی کا نکاح بھی وڈیروں سے کروائیں گے۔
فوری کارروائی نہ ہونے اور انصاف نہ ملنے کی پاداش میں انتہائی قدم اٹھانے کی مجبوری ظاہر کرنے والے فرد کے مطابق اوباڑو تھانے کی حدود میں بیٹھ کر وڈیروں نے فیصلہ کیا کہ میری بھتیجی ان کے حوالے کی جائے۔
ویڈیو پیغام میں پیپلزپارٹی کے سینیٹر پر وڈیروں کی پشت پناہی کا الزام لگانے والے شخص کا کہنا تھا کہ حالیہ جرگے کے فیصلے کو روکنے کے لیے ان کا ساتھ دیں۔
جس ملک میں اتنی زیادتیاں اور ناانصافیاں ہوں، ظلم ہو وہ کیسے چل رہا ہے سمجھ نہیں آتی۔ ایک دن اشرافیہ کے ہاتھوں یہ ملک چلا جائے گا دیکھئے گا۔ pic.twitter.com/13PwbGp4fw
— Imtiaz Chandio (@imtiazchandyo) August 22, 2023
اپنا رابطہ نمبر اور دیگر تفصیل شیئر کرتے ہوئے انہوں نے اپیل کی کمسن بھتیجی کا زبردستی نکاح رکوانے کے لیے کردار ادا کیا جائے۔
انتہائی جذباتی انداز میں دیے گئے پیغام کے شروع میں مذکورہ فرد نے کہا کہ ’آج پاکستان ہار گیا، میں ہار گیا، میرا 5 سال کا احتجاج ہار گیا۔‘
