جڑانوالہ میں مسیحی برادری کی بستی اور گرجا گھر جلانے کے واقعہ کی تحقیقات اور ٹرائل کے لیے انکوائری کمیٹی تشکیل دینے کی درخواست دائر کر دی گئی ہے۔
مسیحی برادری کی نجی تنظیم نے لاہور ہائیکورٹ میں درخواست دائر کی ہے۔ جس میں پنجاب حکومت سمیت دیگر کو فریق بنایا گیا ہے۔
لاہور ہائیکورٹ میں دائر کی گئی درخواست میں موقف اختیار کیا گیا ہے کہ سانحہ جڑانوالہ کے مقدمے میں 500 سے زائد افراد نامزد ہیں جبکہ پولیس نے 25 سے 30 ملزمان کو گرفتار کیا ہے۔
درخوست میں کہا گیا ہے کہ مسیحی برادری کی جانوں کو خطرہ ہے، عدالت سانحہ کی صاف و شفاف تحقیقات اور ٹرائل کرنے کے لیے انکوائری کمیٹی تشکیل دے۔
یہ بھی موقف اختیار کیا گیا ہے کہ عدالت متاثرہ خاندانوں کو امداد فراہم کرنے کا حکم دے تاکہ وہ اپنی روزمرہ کی زندگی شروع کرسکیں۔
