صوبائی وزیر اطلاعات و ثقافت پنجاب عامر میر کا کہنا ہے کہ کوئی بھی تھیٹر اسکرپٹ کی سکروٹنی، فل ڈریس ریہرسل اور این او سی کے بغیر ڈرامہ نہیں دکھا سکے گا، اس عمل کی مانیٹرنگ کے لیے پنجاب آرٹس کونسل کی ٹیمیں صوبے بھر میں ڈراموں کی روزانہ کی بنیاد پر نظر رکھیں گی۔
وزیر اطلاعات و ثقافت پنجاب عامر میر کی ہدایت پر پنجاب آرٹس کونسل کی جانب سے اسٹیج ڈراموں کی آڑ میں فحاشی و عریانی پھیلانے والوں کے خلاف گھیرا تنگ کرتے ہوئے پنجاب آرٹس کونسل نے ڈپٹی کمشنرز گوجرانولہ، بہاولپور، ملتان، رحیم یار خان، ساہیوال، بھکر، شیخوپورہ اور پاکپتن کو ہدایات جاری کر دیں۔
صوبائی وزیر عامر میر کا کہنا ہے کہ ڈرامہ ایکٹ کی خلاف ورزی کرنے اور فحاشی پھیلانے والے اداکاروں، پروڈیوسرز اور تھیٹر مالکان کے خلاف سخت کارروائی کی جائے گی۔
مزید پڑھیں
انہوں نے تمام ڈپٹی کمشنرز کو ہدایات جاری کرتے ہوئے کہاکہ اپنے اپنے متعلقہ اضلاع میں ڈرامہ ایکٹ اور ہوم ڈیپارٹمنٹ کی جانب سے جاری ایس او پیز پر عملدرآمد کو یقینی بنایا جائے۔
عامر میر کے مطابق ایس او پیز کی خلاف ورزی کرنے والوں کے خلاف بلا امتیاز قانونی کارروائی کی جائے گی، کوئی بھی تھیٹر اسکرپٹ کی سکروٹنی، فل ڈریس ریہرسل اور این او سی کے بغیر ڈرامہ نہیں دکھا سکے گا۔
ان کا کہنا تھاکہ پنجاب آرٹس کونسل کی ٹیمیں صوبے بھر میں ڈراموں کی روزانہ کی بنیاد پر مانیٹرنگ کر رہی ہیں، جہاں بھی شکایت موصول ہوئی وہاں سخت کارروائی کی جائے گی۔
