لاہورپولیس کا اینٹی نارکوٹیکس (اے این ایف) یونٹ مبینہ طور پر منشیات فروشی میں ملوث نکلا، انچارج ڈی ایس پی کے گھر سے 8 کروڑ کیش اور منشیات کی بھاری کھیپ برآمد کر لی گئی، سب انسپکٹر سمیت 4 اہلکاروں کو حراست میں لے لیا گیا۔
لاہور پولیس نے منشیات فروشی کے سدِباب کے لیے اینٹی نارکوٹیکس یونٹ بنایا، تھانہ گلشن اقبال میں انچارج ڈی ایس پی مظہر اقبال مبینہ طور پر منشیات فروشی میں ملوث پائے گئے۔
اینٹی نارکوٹیکس فورس نے ایک گرفتار منشیات فروش کی نشاندہی پر انچارج ڈی ایس پی کے گھر چھاپہ مارا تومبینہ طور پر ڈی ایس پی کے گھر سے 8 کروڑ کیش، 7 کلو آئیس اور بھاری مقدار میں چرس برآمد ہوئی۔
مزید پڑھیں
تاہم چھاپے سے کچھ دیر پہلے ڈی ایس پی مظہر اقبال موقعہ سے فرار ہو گئے۔ اس معاملے پر آئی جی پنجاب ڈاکٹر عثمان انور کا کہنا تھا کہ فورس میں جزا اور سزا کا عمل جاری ہے، ہر جرم کی تحقیقات ہو گی۔
پولیس حکام کے مطابق اینٹی نارکوٹیکس فورس نے یونٹ کے سب انسپکٹر محمود ،اے ایس آئی کاشف اور ہیڈ کانسٹیبل شکیل سمیت 4 پولیس ملازمین کو حراست میں لے لیا ہے۔
پولیس کے مطابق ڈی ایس پی کی گرفتاری کے لیے چھاپے مارے جا رہے ہیں، جلد گرفتار کر لیا جائے گا۔
