یورپی یونین نے اعتراف کیا ہے کہ یوکرین پر حملے کے بعد سے سوشل میڈیا ٹیکنالوجی کمپنیاں روس کی جانب سے بڑے پیمانے پر غلط معلومات پھیلانے اور پروپیگنڈا پھیلانے کی مہم کو روکنے میں ناکام رہی ہیں۔
یورپین یونین کمیشن کی رپورٹ میں کہا گیا ہے کہ 2023 میں سوشل میڈیا پر ’کریملن کے حمایت یافتہ اکاؤنٹس کی رسائی اور اثر و رسوخ‘ میں مزید اضافہ ہوا ہے۔
رپورٹ میں مزید کہا گیا ہے کہ ایلون مسک کی جانب سے کمپنی خریدنے کے بعد سے ایکس (سابق ٹوئٹر) پر روس کی غلط معلومات اور پروپیگنڈے میں اضافہ ہوا ہے۔
برطانوی خبر رساں ادارے کے مطابق یورپین یونین کے اس دعوے کے بعد ٹوئٹر، میٹا، ٹک ٹاک اور یوٹیوب سے رابطہ کیا گیا، لیکن ان کی طرف سے کوئی جواب نہیں دیا گیا۔
یورپین یونین کمیشن کی جانب سے جاری ہونے والی اس تحقیق میں ’کریملن‘ کے حمایت یافتہ سوشل اکاؤنٹس اور ان کی جانب سے پھیلائی جانے والی غلط معلومات سے نمٹنے کی کوششوں کا جائزہ لیا گیا ہے۔
جائزے کے بعد یہ بات سامنے آئی ہے کہ روس کے پروپیگنڈے میں اضافہ ’خاص طور پر اس وقت زیادہ دیکھنے کو ملا جب ایکس (سابق ٹوئٹر)نے پرائیوسی پالیسی کو تبدیل کیا اور حفاظتی اقدامات کو ختم کر دیا۔
اس سے قبل برطانوی خبر رساں ادارے نے رپورٹ دی تھی کہ کریملن کے سرکاری سوشل میڈیا اکاؤنٹس سے یوکرین میں جنگ کے بارے میں غلط معلومات پھیلائی جا رہی ہیں۔
رپورٹ میں مزید کہا گیا ہے کہ کریملن کے حامی اکاؤنٹس سے پیغامات میٹا کے پلیٹ فارمز پر سے سب سے زیادہ سامعین تک پہنچ رہے ہیں جب کہ ٹیلی گرام پر بھی کریملن (روس) کے حمایت یافتہ اکاؤنٹس کی تعداد میں 3 گنا سے زیادہ اضافہ ہوا ہے۔
مزید پڑھیں
واضح رہے کہ رواں ماہ کے اوائل میں یورپی یونین کے ڈیجیٹل سروسز ایکٹ (ڈی ایس اے) کے تحت دنیا کے سب سے بڑے آن لائن پلیٹ فارمز کے لیے سخت قوانین متعارف کرائے گئے تھے۔
تمام بڑی سوشل میڈیا کمپنیوں کو ڈی ایس اے کے سخت قوانین پر عمل کرنا ہوگا جو کم از کم 45 ملین ماہانہ فعال صارفین والے بڑے پلیٹ فارمز سے غلط معلومات اور نفرت انگیز تقاریر سمیت مواد کی روک تھام کے لیے زیادہ جارحانہ اقدامات کا مطالبہ کرتے ہیں۔
مطالعے میں یہ نتیجہ اخذ کیا گیا ہے کہ اگر ڈی ایس اے گزشتہ ماہ سے پہلے فعال ہوتا تو سوشل میڈیا کمپنیاں اپنے قانونی فرائض کی خلاف ورزی کرتی جس کے نتیجے میں ممکنہ جرمانے ہوسکتے تھے۔
رپورٹ میں 9 اپریل کی ایک ٹوئیٹ کا بھی حوالہ دیا گیا ہے جس میں ایلون مسک نے تصدیق کی تھی کہ ان کا پلیٹ فارم اب کریملن کے زیر انتظام اکاؤنٹس کو محدود نہیں کرے گا۔
ایلون مسک کا نکتہ نظر یہ ہے کہ سنسرشپ میں صرف اس لیے شامل ہونا ایک کمزور اقدام ہے کیوں کہ دوسری کمپنیاں بھی ایسا کرتی ہیں ۔ مسک نے اس وقت ٹوئیٹ کیا تھا کہ ہمارے پلیٹ پر آزادی اظہار رائے کو زیادہ اہمیت دی جائے گی، یہ ایک ایسا پلیٹ فارم ہو گا جس پر کمزور بھی اپنی طاقت کا مظاہرہ کر سکتے ہیں۔