بنام مشتاق احمد یوسفی

’پالتو جانوروں میں کتوں سے پیار ہے۔ پہلا کتا چوکیداری کے لیے پالا تھا۔ اسے کوئی چرا کر لے گیا۔ اب بر بنائے وضع داری پالتا ہوں کہ انسان کتے کا بہترین رفیق ہے۔ بعض تنگ نظر اعتراض کرتے ہیں کہ مسلمان کتوں سے بلاوجہ چڑتے ہیں حالانکہ اس کی ایک نہایت معقول اور منطقی وجہ موجود ہے۔ مسلمان ہمیشہ سے ایک عملی قوم رہے ہیں۔ وہ کسی ایسے جانور کو محبت سے نہیں پالتے جسے ذبح کرکے کھا نہ سکیں۔‘

’مرزا خدا کے ان حاضر و ناظر بندوں میں سے ہیں جو محلے کی ہر چھوٹی بڑی تقریب میں، شادی ہو یا غمی، موجود ہوتے ہیں۔ بالخصوص دعوتوں میں سب سے پہلے پہنچتے ہیں اور سب کے بعد اٹھتے ہیں۔ اس نشست و برخاست نے ایک کھلا فائدہ یہ دیا ہے کہ وہ باری باری سب کی غیبت کر ڈالتے ہیں۔ ان کی کوئی نہیں کر پاتا۔‘

’ہوش خلیج آبادی، اس ظالم کے تقاضائے وصل کے یہ تیور ہیں گویا کوئی کابلی پٹھان ڈانٹ ڈپٹ کر ڈوبی ہوئی رقم وصول کر رہا ہے۔ مگر وہ زبان کے بادشاہ ہیں، زبان ان کے گھر کی لونڈی ہے اور وہ اس کے ساتھ ویسا ہی سلوک کرتے ہیں۔‘

’ہم تو اسپتال میں مرنے کے خلاف نہیں۔ ویسے تو مرنے کے لیے کوئی جگہ ناموزوں نہیں، لیکن پرائیویٹ اسپتال اور کلینک میں مرنے کا سب سے بڑا فائدہ یہ ہے کہ مرحوم کی جائیداد، جمع جتھا اور بینک بیلنس کے بٹوارے پر پسماندگان کے درمیان خون خرابہ نہیں ہوتا۔ کیونکہ وہ سب ڈاکٹروں کے حصے میں آتا ہے۔‘

مذکورہ بالا چاروں اقتباسات مشتاق احمد یوسفی کے قلم پارے ہیں۔ مشتاق احمد یوسفی اپنے منفرد اور اچھوتے انداز کی بدولت اردو میں شگفتہ نگاری کے سرخیل ہیں۔ ان کا اختصاص یہ ہے کہ وہ پھکڑ پن، فقرے اور جگت بازی کے برعکس شائستگی، شگفتگی اور شوخی کی بدولت قاری کی توجہ کھینچتے ہیں۔

وہ اپنے کرداروں اور منظر نگاری سے مزاح کے کینوس پر ایسی ایسی تصاویر بناتے ہیں جو ان کے پرستاروں نے آج بھی اپنے قلوب و اذہان میں آویزاں کر رکھی ہیں۔ انہوں نے چست جملوں، اشعار، مصرعوں، محاوروں، ضرب الامثال اور کہاوتوں کے بر محل استعمال سے اپنی شگفتہ نگاری کا وہ معیار قائم کیا ہے، جسے چھونا ہر قلم کار کا خواب ہے۔ زیر نظر تحریر ان کے صد سالہ یوم پیدائش (2023۔1923) پر نذرانہ عقیدت ہے۔

’کہ آپ اپنا تعارف ہوا بہار کی ہے‘

مشتاق احمد یوسفی یکم محرم 1342 ہجری بمطابق 4 ستمبر 1923 کو راجستھان کے ضلع ٹونک کے نواحی علاقے ’ستوانسا‘ میں پیدا ہوئے (بقول یوسفی جہاں کے خربوزے اور ’چکو باز‘ مشہور ہیں)۔ ان کے والد عبدالکریم خان یوسفی وہاں کے پہلے گریجویٹ مسلمان تھے۔ مشتاق احمد یوسفی نے ابتدائی تعلیم جے پور سے حاصل کی۔ آگرہ یونیورسٹی سے بی ۔اے کرنے کے بعد علی گڑھ مسلم یونیورسٹی سے ایل ایل بی اور ایم اے فلسفہ کی ڈگری حاصل کی۔ 1946ء میں پرونشل سول سروس کے امتحان میں کامیاب ہوکر ایڈیشنل ڈپٹی کمشنر مقرر ہوئے۔ 1947 میں قیام پاکستان کے بعد مشتاق احمد یوسفی کا خاندان کراچی آ بسا۔

1950 میں انہوں نے کراچی میں بینک کاری میں اپنی نئی زندگی کا آغاز کیا ، مسلم کمرشل بینک میں بحیثیت ڈپٹی جنرل مینیجر تعینات ہوئے۔ 1965 میں الائیڈ بینک کے مینیجنگ ڈائریکٹر مقرر ہوئے۔ 1974 میں یونائٹڈ بینک کے صدر بنے۔ 1977 میں انہیں پاکستان بینکنگ کونسل کا چیئرمین بنایا گیا۔ انہوں نے 11 برس تک لندن میں بی سی سی آئی کے مشیر کی حیثیت سے خدمات انجام دیں اور 1990 میں کراچی واپس لوٹ آئے۔ مشتاق احمد یوسفی 20 جون 2018 کو کراچی میں انتقال کر گئے اور وہیں آسودہ خاک ہیں۔

’دیکھو یہ میرے خواب تھے دیکھو یہ میرے زخم ہیں‘

مشتاق احمد یوسفی نے 1955 میں ’صنفِ لاغر‘ کے عنوان سے تحریر لکھ کر شگفتہ نگاری کا آغاز کیا، ان کی پہلی تحریر معروف ادبی جریدے ’سویرا‘ میں شائع ہوئی۔ 1961 میں پہلی کتاب ’چراغ تلے‘ شائع ہوئی۔ دوسری کتاب ’خاکم بدہن‘ 1969 میں، تیسری کتاب ’زرگزشت‘ 1976 میں، چوتھی کتاب ’آبِ گم‘ 1989 میں اور پانچویں کتاب ’شامِ شعر یاراں‘ کے نام سے 2014 میں شائع ہوئی تھی۔

خاکم بدہن اور زرگزشت پر مشتاق احمد یوسفی کو بابائے اردو مولوی عبدالحق ایوارڈ اور آدم جی ایوارڈ سے نوازا گیا۔ حکومت پاکستان نے انہیں 1999 میں ہلالِ امتیاز، 2002 میں ستارہ امتیاز جبکہ اکادمی ادبیات پاکستان نے 1999 میں کمال فن ایوارڈ سے بھی نوازا تھا۔

چراغ تلے میں خود پیش لفظ لکھا اور اپنے حلیے کی طرف کچھ اس طرح سے اشارہ کرتے ہیں۔’ اوور کوٹ پہن کر بھی دبلا دکھائی دیتا ہوں۔ عرصے سے مثالی صحت رکھتا ہوں۔ اس لحاظ سے کہ جب لوگوں کو کراچی کی آب و ہوا کو برا ثابت کرنا مقصود ہو تو اتمام حجت کے لیے میری مثال دیتے ہیں۔‘

’پڑئیے گر بے مار‘ میں لکھتے ہیں ’سنا ہے کہ شائستہ آدمی کی پہچان یہ ہے کہ اگر آپ اُس سے کہیں کہ مجھے فلاں بیماری ہے تو وہ کوئی آزمودہ دوا نہ بتائے۔ شائستگی کا یہ سخت معیار صحیح تسلیم کر لیا جائے تو ہمارے ملک میں سوائے ڈاکٹروں کے کوئی اللہ کا بندہ شائستہ کہلانے کا مستحق نہ نکلے۔‘

مشتاق احمد یوسفی نے زرگزشت کو اپنی سوانح نو عمری قرار دیا ہے۔ اس سے ایک اقتباس ملاحظہ کریں۔ ’ہمیں یاد ہے جون کا مہینہ فری امپورٹ کا زمانہ تھا۔ کام بے اندازہ آدمی کم۔ ہم چار آدمیوں کے برابر کام اور آٹھ آدمیوں کے برابر غلطیاں بڑی تن دہی سے کررہے تھے۔ ایک منحوس صبح خبر آئی کہ کہ ٹنڈو آدم میں اخبار پڑھتے پڑھتے ابا جان پر دل کا دورہ پڑا، اور زمین نے اپنی امانت واپس لے لی۔ حیدر آباد میں ان کی تدفین کے سلسلہ میں تین دن کی رخصت اتفاقیہ لینے کی پاداش میں یعسوب الحسن غوری نے ہماری تنخواہ کاٹ لی۔ جو کچھ عرصہ بعد انڈریسن نے اس وارننگ پر واپس دلوا دی کہ ’آئندہ اس واقعہ کو نہیں دہرایا جائے گا۔‘

’شامِ شعر یاراں‘ یوسفی صاحب کے تبرک کے طور پر ہی پڑھی جا سکتی ہے۔

سینئر صحافی ظفر سید نے24 اکتوبر 2014 کو شائع ہوئے اپنے مضمون میں ’شامِ شعریاراں‘ کے بارے میں لکھا تھا کہ ’ مشتاق احمد یوسفی کی ربع صدی کے بعد آنے والی کتاب ’شامِ شعریاراں‘ کا اردو حلقوں میں بڑی شدت سے انتظار کیا گیا لیکن کتاب پڑھ کر امیدوں کے محل زمین پر آ رہے۔ کتاب کیا ہے، طرح طرح کی الم غلم تحریریں جمع کرکے بھان متی کا کنبہ جوڑ رکھا ہے۔ وہ انداز جس نے گذشتہ نصف صدی سے یوسفی کو یوسفی بنایا ہوا ہے، اس کتاب میں ماند نظر آتا ہے۔ اور اس کی وجہ صاف ظاہر ہے، مجلسی گفتگو، تہنیتی اجلاسوں اور تعزیتی محافل میں وہ بات کہاں آ سکتی ہے جو جم کر کسی ایک موضوع پر پوری توجہ مرکوز کرکے لکھی جانے والی کتاب میں ہو سکتی ہے۔ فی الحال تو یہ کتاب یوسفی صاحب کے تبرک کے طور پر ہی پڑھی جا سکتی ہے۔‘

’ہم اردو مزاح کے عہد یوسفی میں جی رہے ہیں‘ یوسفی مشاہیر کی نظر میں

مشتاق احمد یوسفی وہ شفگتہ نگار ہیں جن کی ایک ایک سطر قاری سے توجہ کا خراج طلب کرتی ہے، ان کی تحریر سے حظ اٹھانے کے لیےکئی بار پڑھنے کی ضرورت پڑتی ہے۔ وہ لفظوں کے الٹ پھیر سے ایسا جملہ بُنتے ہیں کہ اسے گرفت میں لینے کے لیے قاری کو ’الرٹ‘ رہنا پڑتا ہے۔ ان کی شگفتہ نگاری سے وہی مستفید ہو سکتا ہے جس کی ادب پر گہری نظر ہو۔ مشتاق احمد یوسفی کو ہم عصروں نے عہد موجود کا سب سے بڑا شگفتہ نگار تسلیم کیا تھا، یہاں تک کہ ڈاکٹر ظہیر فتح پوری نے کہا تھا ’ہم اردو مزاح کے عہد یوسفی میں جی رہے ہیں۔‘ چند معروف شخصیات کی آرا:

یوسفی فنِ تحریف کے بادشاہ تھے، ابنِ انشا

ابنِ انشاء نے کہا تھا کہ ’ کرداروں کی اچھل کود یا الفاظ کا غیر ضروری بگاڑنا مزاح کو مسخرہ پن میں تبدیل کر سکتا ہے اور کئی نامور لکھاریوں کا دامن ان کانٹوں میں الجھ الجھ گیا جبکہ یوسفی اس خار زارِ سے بے خطر نکل گئے۔ اور یہ اسی وقت ممکن ہوتا ہے کہ جب لکھنے والے کے ترکش میں بذلہ سنجی، حاضر جوابی، ضلع جگت، پھبتیوں اور چست فقروں کے تیر بھی ہوں، وسعتِ مطالعہ بھی اور زبان و بیان پر دسترس بھی۔ یوسفی فنِ تحریف کے بادشاہ تھے۔ ان کے ہاں اشعار اور مصرعوں میں تصرف و تحریف پھلجڑیوں کی طرح ورق در ورق پھوٹتے چلے جاتے ہیں۔ غالب نے لکھا تھا کہ ’میں نے وہ اندازِ تحریر ایجاد کیا کہ مراسلہ کو مکالمہ بنا دیا۔‘ یوسفی نے مرزا کی مدد سے انشائیہ کو مکالمہ بنا دیا ہے جو صرف ان کے اور ہمزاد کے مابین نہیں ہے بلکہ سہ فریقی ہے کہ قاری بھی اس میں شانہ بہ شانہ شامل رہتا ہے۔

’یوسفی کی طنازی اور دلفریبی دونوں قابل ذکر ہیں‘ ڈاکٹر اسلم فرخی

’اردو طنز و مزاح میں ایک ایسی نئی اور بھرپور آواز کا اضافہ ہوا ہے جو الگ سے پہچانی جا سکتی ہے۔ جس کی طنازی اور دلفریبی دونوں قابل ذکر ہیں۔ یوسفی طرز بیان، ادبیت، ذہانت اور برجستگی میں ڈوبا ہوا ہے۔ وہ بات میں سے بات پیدا نہیں کرتے، بلکہ بات خود کو ان سے کہلوا کرایک طرح کی طمانیت اور افتخار محسوس کرتی ہے۔‘

مشتاق احمد یوسفی ہمارے دور کے سب سے بڑے طنز و مزاح نگار ہیں، شمس الرحمٰن فاروقی

’مشتاق احمد یوسفی ہمارے دور کے سب سے بڑے طنز و مزاح نگار ہیں۔ ان کے مزاح میں شعر وادب کا علم کچھ اس طرح پیوست ہے، اردو زبان کی وسعتوں پر انہیں اس قدر قابو ہے کہ انہیں پڑھنے اور ان کے فن کا پورا لطف حاصل کرنے کے لیے ہمارا بالغ نظر اور وسیع مطالعہ کا حامل ہونا ضروری ہے۔ پرانی باتوں، خاص کر زمانہ گزشتہ کے اشعار اور عبارات کو پر لطف تحریف کے ساتھ پیش کرنا یوسفی کا خاص انداز ہے۔ قاری کی نظر اگر ان پرانے حوالوں پر ہو تو وہ یوسفی کی مزاحیہ تحریف کو سمجھ سکتا ہے اور پھر وہ ان کی پہنچ اور ندرت خیال کی داد دیے بغیر نہیں رہ سکتا۔‘