اسلام آباد میں نگراں وفاقی وزیر ڈاکٹر گوہر اعجاز سے امریکی سفیر ڈونلڈ بلوم نے جب کہ نگراں وزیر خارجہ جلیل عباس جیلانی سے بیلجیئم کے سفیر چارلس ڈیلوگن نے علیحدہ علیحدہ ملاقات کی۔ ان ملاقاتوں میں دو طرفہ تجارت کے فروغ اور پاکستان میں سرمایہ کاری بڑھانے پر اتفاق کیا گیا۔
گوہر اعجاز سے امریکی سفیر ملاقات
نگراں وفاقی وزیر تجارت ڈاکٹر گوہر اعجاز سے امریکی سفیر ڈونلڈ بلوم نے ملاقات کی، اس موقع پر دوطرفہ تجارتی تعلقات کو مضبوط بنانے، امریکا اور پاکستان کے درمیان باہمی تعاون کو فروغ دینے پر تبادلہ خیال کیا گیا۔
دوران ملاقات گفتگو کرتے ہوئے ڈاکٹر گوہر اعجاز نے کہا کہ حکومت پاکستان نے ایک خصوصی سرمایہ کاری سہولت کونسل تشکیل دی ہے جس کا مقصد مختلف شعبوں مثلاً کانوں، معدنیات، زراعت، انفارمیشن ٹیکنالوجی اور توانائی میں سرمایہ کاری کو راغب کرنا ہے۔
پاکستان میں سرمایہ کاری کی دعوت
ڈاکٹر گوہر اعجاز نے سفیر کی وساطت سےامریکی کمپنیوں کو پاکستان میں سرمایہ کاری کرنے کی بھی دعوت دی۔گوہر اعجاز نے سفیر کے ساتھ اقتصادی بحالی کے منصوبے کے لیے حکومتی کوششوں کے بارے میں تفصیل سے بتایا۔
مزید پڑھیں
انہوں نے پاکستان کے مستقبل کی معاشی ترقی کی اہمیت کو اجاگر کیا اور امریکی حکومت کی مسلسل حمایت پر سراہا۔
ٹیکسٹائل، ویل ایڈڈ فوڈ پروڈکٹس، تازہ آم اور کھجور، سویا بین اور بیف سمیت مختلف شعبوں میں تجارت کو فروغ دینے کے ممکنہ مواقع پر گفتگو ہوئی۔
جلیل عباس جیلانی سے بیلجیئم کے سفیر کی ملاقات
وزیر خارجہ جلیل عباس جیلانی سے پاکستان میں بیلجیئم کے سفیر چارلس ڈیلوگن نے جمعرات کو ملاقات کی۔
دفتر خارجہ کے مطابق انہوں نے دوطرفہ تعاون کے شعبوں اور اہم علاقائی اور عالمی پیش رفت پر تبادلہ خیال کیا۔
انہوں نے تمام شعبوں بالخصوص تجارت اور سرمایہ کاری میں تعاون بڑھانے پر اتفاق کیا۔
