پاکستان تحریک انصاف (پی ٹی آئی ) کے چیئرمین اور سابق وزیراعظم عمران خان نے جیل میں ورزش کے لیے مشینیں مہیا کرنے کا مطالبہ کردیا ہے۔
ذرائع نے بتایا ہے کہ سابق وزیراعظم عمران خان نے وکلا کو ہدایت کی ہے کہ وہ عدالت سے استدعا کریں کہ انہیں جیل میں ورزش کے لیے بنیادی مشینری مہیا کی جائے۔
مزید پڑھیں
ذرائع نے مزید بتایا کہ سابق وزیراعظم عمران خان کی لیگل ٹیم نے اس حوالے سے قانونی مشاورت شروع کردی ہے اور جلد ہی سابق وزیر اعظم اور پاکستان تحریک انصاف ( پی ٹی آئی) کے چیئرمین کو جیل میں ورزش کے لیے مشینری کی فراہمی کے لیے عدالت سے قانونی اجازت طلب کی جائے گی۔
واضح رہے کہ سابق وزیراعظم عمران خان کو گزشتہ ماہ توشہ خانہ کیس میں 3 سال قید کی سزا ہوئی تھی تاہم 29 اگست کو اسلام آباد ہائیکورٹ نے ان کی سزا معطل کردی تھی جس کے بعد انہیں سائفر کیس میں گرفتار کر لیا تھا۔
سابق وزیر اعظم عمران خان کے وکلا نے سائفر مقدمے میں ضمانت کی درخواست دائر کررکھی ہے تاہم جج کے چھٹی پر جانے کے باعث 2 مرتبہ مقررہ تاریخ پر سماعت نہ ہو سکی۔
یہ بھی واضح رہے کہ آئی جی جیل خانہ جات اس سے قبل کہہ چکے ہیں کہ سابق وزیر اعظم اور پاکستان تحریک انصاف ( پی ٹی آئی ) کے چیئرمین کو اٹک جیل میں تمام تر سہولیات مہیا کی گئی ہیں۔
