حمزہ شہباز لندن روانہ، کوئی بڑا ٹاسک ملنے والا ہے؟

سابق وزیر اعلی پنجاب حمزہ شہباز آج صبح قطر ایئر لائن کے ذریعے لندن روانہ ہو گئے ہیں، جہاں ان کے والد شہباز شریف اور بھائی سلمان شہباز پہلے ہی موجود ہیں۔ بتایا جاتا ہے کہ حمزہ شہباز اپنے والد کی کال پر لندن روانہ ہوئے ہیں ۔

لیگی ذرائع نے وی نیوز کو بتایا کہ لندن میں شریف خاندان کی ایک بڑی بیٹھک ہونے والی ہے جس میں فیملی کے لوگوں کو بڑی ذمہ داریاں سونپی جائیں گی۔ حمزہ شہباز نواز شریف کے استقبال کی تیاریوں سمیت ن لیگ کی تنظم سازی اور آئندہ الیکشن کی تیاریوں کے حوالے سے رپورٹ پیش کریں گے۔

لیگی ذرائع نے بتایا حمزہ شہباز وزرات اعلی چھین جانے کے بعد کافی خاموش رہے ہیں لیکن اب انہیں کوئی بڑی ذمہ داری ملنی والی ہے۔ ہو سکتا ہے حمزہ شہباز جب لندن سے لاہور واپس آئیں تو پہلا ٹاسک  نواز شریف کا استقبال ہوگا اور دوسرا لاہور میں ایک بڑے جلسے کا انعقاد۔

لیگی ذرائع کے مطابق بظاہر نواز شریف کی استقبال کی تیاریاں مریم نواز کر رہی ہیں لیکن حمزہ شہباز اسکی سربراہی کریں تو ویلکم کرنے کے اچھے رزلٹ مل سکتے ہیں، دوسرا ٹاسک جو ممکنہ طور حمزہ شہباز کو مل سکتا ہے وہ لاہور میں ایک بڑے جلسے کا انعقاد ہے کیونکہ نواز شریف لاہور میں ایک بڑا جلسہ کرنا چاہتے ہیں۔

’ جب بھی میٹنگز ہوتی ہیں تو نواز شریف لاہور میں جلسہ کرنے کے حوالے سے پوچھتے ہیں کہ کب لاہور میں جلسہ ہو سکتا ہے۔۔۔ یہ بھی ممکن ہے کہ آنے والے  کچھ دنوں میں مریم نواز بھی لندن کے لیے روانہ ہوں گی۔‘

حمزہ شہباز کی پارٹی معاملات میں عدم دلچسپی کی وجہ کیا تھی؟

لیگی ذرائع نے بتایا کہ جب حمزہ شہباز سے وزرات اعلی چھین گئی تو یہ فورا لندن چلے گئے وہاں نواز شریف سے ملاقات بھی کی تھی طویل عرصے بعد وطن واپس لوٹے تو قیاس آرائیاں عروج پر تھیں کہ حمزہ شہباز، مریم نواز کو مسلم لیگ (ن) کا چیف آرگنائزر بنائے جانے کے بعد ناخوش ہیں کیونکہ اس پیش رفت نے شہباز کیمپ اور حمزہ کیمپ کو واضح پیغام دیا ہے کہ پارٹی کی حتمی قیادت مریم نواز کے ہی پاس ہوگی اور وہ اپنے والد کی جانشین ہوں گی۔

یہی وجہ ہے کہ اب تک مختلف اجلاسوں سے حمزہ شہباز غائب رہے ہیں اور جن اجلاس کی صدارت حمزہ شہباز کیا کرتے تھے اب ان کی صدرات مریم نواز کررہی ہیں اسی وجہ سے ان کی پارٹی معاملات میں عدم دلچسپی نمایاں رہی ہے۔

حمزہ شہباز کب وطن واپس لوٹیں گے؟

لیگی ذرائع نے وی نیوز کو بتایا کہ اس دفعہ حمزہ شہباز وطن واپسی کا کسی کو کچھ بتا کر نہیں گئے ہیں۔ ان کا اس دفعہ لندن کا قیام غیر معینہ مدت بھی ہوسکتا ہے کیونکہ پہلے جب وہ لندن جاتے تھے تو واپسی کی ممکنہ تاریخ کا عندیہ دیدیتے تھے، لیکن اس دفعہ کچھ بتا کر نہیں گئے۔ ’ممکن ہے جب شریف خاندان کے اندرونی معاملات طے ہو جائیں اس کے بعد ہی حمزہ شہباز وطن واپس آئیں۔‘