کوئٹہ کسٹم کا چینی، پیٹرول، ڈیزل اور نان کسٹم پیڈ گاڑیوں کے خلاف وسیع پیمانے پر کریک ڈاؤن جاری ہے، مختلف مقامات پر چھاپوں کے دوران بڑی تعداد میں چینی، پیٹرول، ڈیزل اور نان کسٹم گاڑیاں برآمد کر لی گئی ہیں۔
درخشاں فیلڈ انفورسمنٹ یونٹ اور ایف آئی اے کے اینٹی کرپشن کوئٹہ سرکل نے بھوسا منڈی میں قائم گودام پر مشترکہ چھاپے کے دوران 2350 پارسلز چینی، اور لکپاس فیلڈ انفورسمنٹ یونٹ نے ایک آئل ٹینکر سے 28 ہزار لیٹر غیر ملکی پیٹرول اور ڈیزل برآمد کیا ہے۔
نوکنڈی کے مقام پر تفتان رائفل اور سندھ رجمنٹ کے تعاون سے افغان بارڈر کے قریب چھاپہ مارا گیا جہاں سے 9 نان کسٹم پیڈ گاڑیوں سمیت 127 کارٹن غیر ملکی برانڈ کے سیگریٹس برآمد کیے گئے۔
ترجمان کوئٹہ کسٹم کے مطابق تینوں کارروائیوں کے دوران برآمد کیے گئے سامان کی قیمت 8 کروڑ سے زائد بنتی ہے۔ کوئٹہ کسٹم کی اسمگلنگ اور اسمگلروں کے خلاف سخت ترین اور کامیاب کارروائیاں جاری ہیں۔
مزید پڑھیں
ترجمان کے مطابق کلیکٹر کسٹمز انفورسمنٹ کوئٹہ عرفان الرحمٰن خان، ایڈشنل کلیکٹر عمر شفیق، ڈپٹی کلیکٹر اسد علیم، اسسٹنٹ کلیکٹر حسیب احمد کی ہدایات پر کارروائیوں کا سلسلہ جاری ہے۔
ترجمان کوئٹہ کسٹم کے مطابق وفاقی حکومت کی ہدایات پر فیڈرل بورڈ آف ریونیو نے پیٹرول ڈیزل، نان کسٹم پیڈ اور خاص کر خوردنی اشیاء (چینی) کی اسمگلنگ کے خلاف سخت ترین پالیسی کو مدنظر رکھتے ہوئے کارروائیوں کا سلسلہ شروع کیا ہے۔
ان کے مطابق ممبر کسٹم آپریشن میڈیم زیبا اظہر اور چیف کلیکٹر کسٹمز بلوچستان عبدالقادر میمن کی واضح ہدایات پر بلوچستان میں اسمگلنگ کے خلاف کامیاب کارروائیاں کی جارہی ہیں۔
واضح رہے انتہائی مشکل حالات اور انتہائی کم افرادی قوت کے ساتھ کسٹمز کوئٹہ صوبہ کے دور دراز علاقے میں بڑی تندہی سے سرگرم عمل ہیں۔
