وفاقی حکومت نے عمران خان کی اہلیہ بشریٰ بی بی کی قریبی دوست فرح گوگی اور ان کے شوہر احسن جمیل گجر کا نام ایگزٹ کنٹرول لسٹ (ای سی ایل) میں ڈالنے کی منظوری دے دی ہے۔
میڈیا رپورٹس کے مطابق کابینہ کی ذیلی کمیٹی کے اجلاس میں فرح گوگی اور احسن جمیل گجر کا نام ای سی ایل میں ڈالنے کی منظوری دی گئی۔
نیب کی جانب سے دونوں کا نام ایگزٹ کنٹرول لسٹ میں ڈالنے کی سفارش کی گئی تھی۔
مزید پڑھیں
دی نیوز اور جیو نے کچھ ماہ قبل اپنی رپورٹس میں کہا تھا کہ فرح خان پہلے ہی پاکستانی اتھارٹیز کے ساتھ تعاون کر رہی ہیں اور ان سے رابطے میں ہیں۔ وہ اور ان کے شوہر احسن جمیل گجر کو پی ٹی آئی کی قیادت نے ایف آئی اے اور دیگر قانونی فورمز کے ساتھ تعاون نہ کرنے کے لیے کہا تھا۔
رپورٹس میں یہ بھی بتایا گیا تھا کہ فرح گوگی پہلے ہی پاکستانی اتھارٹیز سے اہم معلومات شیئر کر چکی ہیں اور ورکنگ ریلیشن شپ بھی تیار ہوچکی ہے۔
یہ بھی پڑھیں جنرل عاصم کو بشریٰ بی بی کی کرپشن کے ثبوت دکھانے پر عہدے سے ہٹانے کی باتوں میں صداقت نہیں:عمران خان
یاد رہے کہ فرحت شہزادی جنہیں فرح گوگی، فرح خان، فرح گجر، فری اور دیگر بہت سی عرفیت سے بھی جانا جاتا ہے عمران خان حکومت کے خلاف عدم اعتماد کے ووٹ کی کامیابی کے ایک دن بعد ہی پاکستان چھوڑ کر فرار ہونے والی پہلی ہائی پروفائل شخصیت تھیں۔
ان کے حوالے سے یہ قیاس آرائیاں پہلے ہی بڑھ چکی تھیں کہ انہیں گرفتار کر لیا جائے گا اور بشریٰ بی بی کے ساتھ مبینہ ڈیلنگ اور حکومتی معاملات چلانے میں براہ راست رول کے بارے میں بھی تفتیش کی جائے گی ۔
واضح رہے کہ وزارت داخلہ ایگزٹ کنٹرول لسٹ یا ای سی ایل میں ان افراد کے نام شامل کرتی ہے جن کے بارے میں کسی عدالت نے کوئی حکمنامہ جاری کیا ہو یا پھر نیب اور خفیہ اداروں کی طرف سے اس شخص کے بارے میں کوئی معلومات فراہم کی گئی ہوں۔
اگرچہ کسی بھی شخص کا نام ای سی ایل میں شامل کرنے کا اختیار ایف آئی اے کے ڈائریکٹر جنرل کے پاس ہوتا ہے لیکن مخصوص صورتحال میں یہ اختیار وزیر داخلہ بھی استعمال کر سکتے ہیں۔
