آرمی چیف جنرل عاصم منیر مختصر دورے پر کراچی پہنچے جہاں انہیں کور ہیڈ کوارٹرز میں کراچی پولیس آفس پر جان لیوا حملے سے متعلق کور ہیڈکوارٹرز میں بریفنگ دی گئی۔
پاک فوج کے شعبہ تعلقات عامہ آئی ایس پی آر کے مطابق کراچی پولیس چیف آفس کے دورے سے قبل آرمی چیف جنرل عاصم منیر اور وزیراعلیٰ سندھ مراد علی شاہ کو کراچی پولیس آفس پر حملے سے متعلق کور ہیڈکوارٹرز میں بریفنگ دی گئی۔
بعد ازاں آرمی چیف نے وزیر اعلی سندھ اور کور کمانڈر کراچی کے ہمراہ کراچی پولیس آفس کا دورہ کیا۔ اس موقع پر آرمی چیف جنرل عاصم منیر کا کہنا تھا دہشت گردوں کا کوئی مذہب یا نظریہ نہیں ہوتا۔
آئی ایس پی آر کے مطابق آرمی چیف جنرل عاصم منیر نے وزیراعلی سندھ مراد علی شاہ کے ہمراہ جناح پوسٹ گریجویٹ میڈیکل سینٹر پہنچے جہاں انہوں نے کراچی پولیس آفس پر حملے میں زخمی پولیس اور رینجرز کے اہلکاروں کی عیادت کی۔
آرمی چیف اور وزیر اعلی سندھ نے فوج پولیس اور رینجرز جوانوں کے بلند حوصلے اور بہادری کو سراہا۔
واضح رہے کہ گزشتہ روز شارع فیصل پر واقع کراچی پولیس آفس پر دہشت گرد حملہ میں 3 دہشت گرد ہلاک جبکہ 3 سیکیورٹی اہلکاروں سمیت ایک سویلین اسٹاف بھی شہید ہوئے تھے۔ حملے کی تحقیقات کے لیے 5 رکنی تحقیقاتی کمیٹی بنا دی گئی ہے۔
