کنٹیکٹ لینز پہن کر سونے سے امریکہ میں ایک نوجوان بینائی سے محروم ہو گیا۔ دی مرر کے مطابق 21سالہ مائیک کروم ہولز نامی اس نوجوان کا تعلق امریکی ریاست فلوریڈا سے ہے۔ گزشتہ دنوں وہ ایک تقریب سے لوٹا اور کنٹیکٹ لینز آنکھوں سے نکالے بغیر ہی سو گیا۔ اگلی صبح اٹھا تو اس کی ایک آنکھ کی بینائی مکمل ختم ہو چکی تھی۔
بینائی سے محروم ہونے والے نوجوان مائیک کا کہنا ہے کہ پہلے جب کبھی وہ کنٹیکٹ لینز اتارے بغیر سوتا تھا تو اس کی نابینا ہونے والی آنکھ کی رنگت گلابی ہو جاتی اور کبھی کسی اور نوعیت کی انفیکشن ہو جاتی۔ تاہم اس بار بینائی ہی چلی گئی۔ رپورٹ کے مطابق جب مائیک ڈاکٹرکے پاس گیا تو اس میں Acanthamoeba Keratitisکی تشخیص ہوئی۔
رپورٹ کے مطابق یہ ایک گوشت کھانے والا کیڑا ہوتا ہے جو آپ کے ٹشو کو کھاجاتا ہے۔ اس خوفناک عارضے کی وجہ سے مائیک کی دائیں آنکھ مکمل طور پر ناکارہ ہو گئی، جس کی وجہ سے وہ اپنی یونیورسٹی کی تعلیم بھی ادھوری چھوڑنے پر مجبور ہو گیاہے۔
امریکہ کے مرکز برائے انسداد امراض کے ماہرین کا کہنا ہے کہ ترقی یافتہ ممالک میں کنٹیکٹ لینز پہننے والے 3کروڑ 30لاکھ لوگوں میں سے ایک شخص اس کیڑے سے متاثر ہوتا ہے۔
