اُمّہ چلڈرن اکیڈمی سے وزیرستان کے ہزاروں طالب علم مستفید اور فارغ التحصیل ہو چکے ہیں۔ اکیڈمی کے پرنسپل ناصر جاوید کا کہنا ہے کہ یہ ادارہ آرمی کی جانب سے وزیرستان کے بچوں کے لیے تحفہ اور احسن اقدام ہے۔
پاک فوج کے زیر سایہ امہ چلڈرن اکیڈمی کا قیام 2011 میں وانا ویلفیئر ایسوسی ایشن کی مدد سے ضلع جنوبی وزیرستان کے علاقے وانا میں یتیم بچوں کی بہتر تعلیم و تربیت کے لیے کیا گیا تھا جہاں 650 طلباء زیر تعلیم ہیں۔ اکیڈمی پریپ سے میٹرک تک کی کلاسوں پر مشتمل ہے۔
مزید پڑھیں
اکیڈمی میں تمام طلباء کو کتابیں اور سٹیشنری بھی مفت فراہم کی جاتی ہیں جبکہ طلباء کے لیے روزمرہ کی بنیاد پر فری لنچ کا بندوبست بھی کیا جاتا ہے۔ دور دراز علاقوں سے آنے والے طلباء کے لیے پاک فوج اور ایف سی کی جانب سے ہاسٹل کی سہولت بھی فراہم کی گئی ہے جس میں بیک وقت 80 طلباء کو رہائش کی سہولیات میسر ہے۔
طلبا نے اکیڈمی سے متعلق مثبت خیالات کا اظہار کیا۔ ایک طالب علم نے کہا کہ میرے والد شہید ہو گئے تھے، میری خواہش ہے میں بڑا ہو کر ڈاکٹر بنوں۔ ایک اور طالب علم نے کہا کہ اسلامی اور جدید تعلیم کے علاوہ امہ چلڈرن اکیڈمی طلباء کو محفوظ اور صحت مند ماحول بھی فراہم کرتی ہے۔
