مرتضیٰ سولنگی سے ذکا اشرف کی ملاقات، کرکٹ کے فروغ پر تبادلہ خیال

نگراں وفاقی وزیر اطلاعات و نشریات مرتضیٰ سولنگی سے چیئرمین مینجمنٹ کمیٹی پاکستان کرکٹ بورڈ (پی سی بی) ذکا اشرف نے ملاقات کی ہے۔

ملاقات میں پاکستان کرکٹ بورڈ اور پی ٹی وی اسپورٹس میں تعاون سمیت دیگر امور پر تبادلہ خیال کیا گیا۔

وزیراطلاعات مرتضیٰ سولنگی نے ملک میں کھیلوں کی سرگرمیوں خصوصاً کرکٹ کی حوصلہ افزائی کے لیے کرکٹ بورڈ کو مکمل تعاون کا یقین دلایا گیا۔

اس موقع پر مرتضیٰ سولنگی نے کہاکہ پی ٹی وی اسپورٹس کھیلوں کو فروغ دینے میں اپنا کردار ادا کررہا ہے، اور ناظرین میں کافی مقبولیت حاصل کر چکا ہے۔

وزیر اطلاعات نے کہاکہ پاکستان کرکٹ بورڈ کرکٹ کے فروغ کے لیے اہم کردار ادا کررہا ہے۔ حکومت کھیلوں کی سرگرمیوں کو فروغ دینے کے لیے پرعزم ہے۔

اس موقع پر ذکا اشرف نے کہاکہ پاکستان کرکٹ بورڈ ملک میں کرکٹ کو ہر سطح پر فروغ دینے کے لیے کام کررہا ہے۔ ملک میں کرکٹ کی ترقی کے لیے پی سی بی اور پی ٹی وی کا تعاون اہمیت کا حامل ہے۔

ذکا اشرف نے کہاکہ پی ٹی وی پر ڈومیسٹک کرکٹ دکھائے جانے سے نوجوان نسل میں شوق مزید بڑھے گا۔

ذکا اشرف نے حکومتی حوصلہ افزائی پر مرتضیٰ سولنگی کا شکریہ ادا کیا۔

اس موقع پر سیکریٹری اطلاعات ظہور احمد، پی ٹی وی کے ڈائریکٹر فنانس ریحان قاسم اور پی ٹی وی کے ڈائریکٹر سپورٹس اسامہ اظہر بھی موجود تھے۔