کرکٹ ورلڈ کپ: بھارت کی جانب سے ویزوں میں تاخیر، پی سی بی کا انٹرنیشنل کرکٹ کونسل سے رابطہ

بھارت میں 5 اکتوبر سے شروع ہونے والے کرکٹ ورلڈ کپ میں شرکت کے لیے پاکستان کرکٹ ٹیم کے کھلاڑیوں اور آفیشلز کو بھارت نے تاحال ویزے جاری نہیں کیے ہیں۔ پاکستان کرکٹ بورڈ نے انٹرنیشنل کرکٹ کونسل سے رابطہ کیا ہے کہ کھلاڑیوں اور آفیشلز کے ویزے جاری کروائے جائیں۔

پی سی بی کے مطابق پاکستان ٹیم نے 27 ستمبر کو بھارت جانا ہے لیکن تاحال ویزے جاری نہیں کیے گئے۔ ویزوں کی تاخیر کے باعث پاکستان ٹیم کا بھارت روانگی کا شیڈول متاثر ہوچکا ہے۔ پاکستان ٹیم نے 25 ستمبر کو براستہ دبئی بھارت روانہ ہونا تھا۔

ہمیشہ کی طرح بھارت اس بار بھی پاکستان کے خلاف ’کھیل میں سیاست‘ کرنے لگا ہے۔ ذرائع کے مطابق ایک طرف پاکستانی کھلاڑی اور آفیشلز بھارت روانگی کے لیے ویزوں کے منتظر ہیں تو دوسری جانب بھارت نے پاکستانی کھلاڑیوں اور آفیشلز کے ویزے سیکیورٹی کلیئرنس سے مشروط کردیے ہیں جس کے باعث ان کے ویزے تاخیر کا شکار ہو گئے ہیں۔

ذرائع کا کہنا ہے کہ بھارتی ہائی کمیشن نے تاحال پاکستان کرکٹ ٹیم اور آفیشلز کے ویزے جاری نہیں کیے کیونکہ بھارتی ہائی کمیشن ان کی سیکیورٹی کلیئرنس کا منتظر ہے، دہلی سے ہوم افیئرز سے سیکیورٹی کلیرئینس کے بعد ہی ویزے جاری کیے جائیں گے۔

واضح رہے کہ پاکستان کرکٹ ٹیم ورلڈ کپ سے قبل حیدرآباد میں نیوزی لینڈ اور آسٹریلیا کے خلاف وارم اپ میچز کھیلے گی۔ پاکستان اور نیوزی لینڈ کے درمیان ورلڈ کپ کا وارم اپ میچ 29 ستمبر کو حیدر آباد کے راجیو گاندھی انٹرنیشنل اسٹیڈیم میں کھیلا جائے گا تاہم سیکیورٹی خدشات کے باعث میچ بغیر تماشائیوں اور بند دروازوں کے پیچھے کھیلا جائے گا۔

بھارتی میڈیا رپورٹس کے مطابق حیدرآباد سٹی پولیس نے 29 ستمبر کو ہونے والے میچ کے میزبان حیدرآباد کرکٹ ایسوسی ایشن (HCA) کو مناسب سیکیورٹی فراہم کرنے سے انکار کر دیا تھا۔