ضلع شیخوپورہ میں قلعہ ستار شاہ اسٹیشن کے قریب مسافر ٹرین ٹریک پر کھڑی ٹرین سے ٹکرا گئی۔ ریسکیو حکام کے مطابق حادثے میں میانوالی سے لاہور جانے والی ٹرین میں سوار 20 مسافر زخمی ہو گئے۔
زخمی ہونے والوں میں سے 5 مسافروں کو ڈسٹرکٹ ہیڈکوارٹر اسپتال منتقل کر دیا گیا ہے۔ واضح رہے کہ ایک روز قبل قلعہ ستار شاہ کے پاس مال گاڑی کی 4 بوگیاں ڈی ٹریک ہو گئی تھیں۔
میانوالی سے آنے والی مسافر ٹرین بھی کانٹا تبدیل نہ ہونے پر اسی ٹریک پر آ گئی۔ مسافر ٹرین کے ڈرائیور کی کوشش کے باوجود ٹرین مال بردار بوگی سے ٹکرا گئی۔ ریلوے ذرائع کے مطابق جائے حادثہ پر ریسکیو کا کام جاری ہے۔
سابق وزیراعظم شہبازشریف کا متاثرہ مسافروں اور ان کے اہل خانہ سے ہمدردی کا اظہار
سابق وزیر اعظم اور پاکستان مسلم لیگ (ن) کے صدر شہباز شریف نے میانوالی سے لاہور جانے والی مسافر ٹرین کے مال گاڑی سے ٹکرانے کے حادثے پر افسوس اور متاثرہ مسافروں اور ان کے اہل خانہ سے ہمدردی کا اظہارکیا ہے۔
انہوں نے کہا ہے کہ واقعے میں غفلت کے ذمہ داروں کے خلاف سخت قانونی کارروائی کی جائے اور زخمیوں کو علاج کی بہترین سہولیات فراہم کی جائیں۔
