سابق وزیر خزانہ اسحاق ڈار نے کہا ہے کہ نوازشریف نے پہلے بھی اپنا معاملہ اللہ پر چھوڑا تھا اور انہیں آج بھی اللہ پر یقین ہے، نوازشریف کیخلاف سازش کرنے والے کم عرصہ میں بے نقاب ہوگئے تھے، انہوں نے 2017 کے کرداروں کا احتساب اللہ پر چھوڑ دیا ہے۔
لندن میں میڈیا سے گفتگو کرتے ہوئے انہوں نے کہا کہ نوازشریف کی تمام توانائیاں ملک کی بہتری کے لیے ہوں گی، میرے خلاف نیب کے بے بنیاد مقدمات بنائے گئے جن کی کوئی اہمیت نہیں۔ اقتدار میں آنے کے بعد نواز شریف انتقام کے بجائے ملک کو ٹھیک کرنے پر بھرپور توجہ دیں گے۔
انہوں نے مزید کہا کہ نواز شریف کو نکالنے والوں نے ملک پر ظلم کیا، پاکستان کی ترقی کئی برس پیچھے دھکیل دی گئی۔ 2018 میں نواز شریف نے پی ٹی آئی کے مینڈیٹ کو عزت دی، ملک کو تباہ کرنے والوں سے اللہ انتقام لے گا۔
مزید پڑھیں
اسحاق ڈار نے کہا کہ ہماری کوشش ہے آئندہ الیکشن میں قوم نواز شریف کو بھاری اکثریت میں ووٹ ڈالے، ہماری اکثریت ہوگی تو ہم مشکل فیصلے کرسکیں گے۔ ان کا کہنا تھا پارٹی کا بیانیہ نوازشریف نے طے کیا ہے، ایک ہی کام ہوسکتا ہے، ملک کو ٹھیک کریں یا پھر انتقام لینے میں لگ جائیں۔
