سیاست دان ایماندار ہوتے تو ملک کا یہ حال نہ ہوتا، پرویز خٹک

پاکستان تحریک انصاف پارلیمنٹرینز(پی ٹی آئی پی) کے سربراہ پرویز خٹک نے کہا ہے کہ موجودہ ملکی حالات کی ذمہ دار ساری سیاسی پارٹیاں ہیں۔

کوہاٹ میں جلسہ سے خطاب کرتے ہوئے پرویز خٹک نے کہاکہ اگر سیاسی لوگ ایماندار ہوتے تو ملک کا یہ حال نہ ہوتا، کرپٹ حکمران کبھی ملک کو ترقی نہیں دے سکتے۔

انہوں نے کہاکہ عمران خان نے نئے پاکستان کا جھوٹا نعرہ لگایا اور ملک کو تباہ کیا، ہم کب تک کھوکھلے نعروں کے پیچھے بھاگتے رہیں گے۔

پرویز خٹک نے کہاکہ ہم نے اپنے دور میں عوام کو صحت کارڈ مہیا کیے، باقی پارٹیاں بھی بتائیں انہوں نے اپنے اپنے دور میں کیا کِیا۔

سربراہ پی ٹی آئی پارلیمنٹیرینز نے کہاکہ ان سیاسی جماعتوں کی وجہ سے ہی ملک میں مہنگائی اور بے روزگاری آئی ہے۔

واضح رہے کہ عمران خان کے قریب سمجھے جانے والے سابق وزیراعلیٰ خیبرپختونخوا نے 9 مئی کے واقعات کو جواز بنا کر عمران خان کو خیرباد کہا تھا اور نئی پارٹی پی ٹی آئی پارلیمنٹیرینز کی بنیاد رکھی ہے۔

پرویز خٹک اس وقت اپنی پارٹی کو عوام میں مقبول کرنے کے لیے بھرپور سیاسی جلسے کر رہے ہیں، سابق وزیراعلیٰ کا دعویٰ ہے کہ وہ خیبرپختونخوا سے بڑی پارلیمانی جماعت بن کر سامنے آئیں گے۔

پرویز خٹک نے عمران خان کو مخاطب کرتے ہوئے یہ بھی کہا تھا کہ آئندہ انتخابات میں بتائیں گے کسی کے جانے سے فرق پڑتا ہے یا نہیں۔