فیڈرل بورڈ آف ریونیو (ایف بی آر) نے رواں مالی سال کی پہلی سہ ماہی کے دوران 1978 ارب روپے کے تفویض کردہ ہدف کے مقابلے میں 2041 ارب روپے جمع کر لیے جو کہ ہدف سے 63 ارب روپے زیادہ ہیں۔
سال 2022 میں اسی عرصہ کے دوران 1644 ارب روپے جمع کیے گئے تھے۔
مزید پڑھیں
ایف بی آر نے ستمبر کے مہینے میں محصولات جمع کرنے کا ہدف پورا کرنے کے لیے غیر معمولی کوششیں کی ہیں اور 794 ارب روپے کے ہدف کے مقابلے میں 834 ارب روپے جمع کیے ہیں جبکہ سال 2022 میں اسی مہینے میں 688 ارب روپے جمع کیے گئے تھے۔
ستمبر کے مہینے میں 37 ارب کے ریفنڈز بھی جاری کیے گئے جبکہ ستمبر 2022 میں 18 ارب روپے کے ریفنڈز جاری کیے گئے تھے۔
دوسری جانب ستمبر 2023 کے دوران درآمدات میں شدید کمی دیکھنے میں آئی ہے۔
گزشتہ ماہ کے دوران درآمدی ٹیکس کی مد میں 299 ارب روپے جمع کیے گئے تھے جبکہ رواں مہینے کے دوران درآمدات کی مد میں صرف 254 ارب روپے کے ٹیکس جمع کیے جا سکے ہیں۔
ایف بی آر نے 45 ارب کی کمی کو ڈومیسٹک ٹیکسوں سے خاص طور پر براہِ راست ٹیکسوں سے پورا کیا ہے۔ ٹیم ایف بی آر نے ہدف پورا کرنے کے لیے زبردست محنت کی ہے۔
ایف بی آر کے افسران اور ملازمین نے اپنے کام سے لگاؤ کا مثالی مظاہرہ کیا ہے۔ فیڈرل بورڈ آف ریونیو نا صرف رواں مالی سال کے آئندہ مہینوں کے دوران اپنے تفویض کردہ ہدف کو پورا کرنے بلکہ اسے عبور کرنے کے لیے پُرعزم ہے۔
