اسموگ کے تدارک کے لیے دائر درخواستوں پر سماعت کے دوران لاہور ہائیکورٹ نے شہر میں غلط جگہ گاڑیاں پارک کرنے والے شہریوں کو 5 ہزار روپے جرمانہ عائد کرنے کی ہدایت کی ہے۔
لاہور میں اسموگ کے تدارک کے لیے دائر درخواستوں پر سماعت لاہور ہائیکورٹ کے جسٹس شاہد کریم نے کی۔ عدالت نے غلط پارکنگ کے علاوہ گھروں پر گاڑیاں دھونے کے رجحان کی حوصلہ شکنی کی غرض سے اس کام میں ملوث شہریوں پر بھی 3 ہزار روپے جرمانہ عائد کرنے کا حکم دیاہے۔
جسٹس شاہد کریم نے ریمارکس دیے کہ یہ جرمانہ واسا کے خزانے میں جائے گا، ملک میں پانی کا ایشو انتہائی سنجیدہ ہوتا جارہا ہے، ایل ڈی اے ہاؤسنگ سوسائٹیز کے رجسٹرار کو احکامات سے متعلق آگاہ کردے۔
عدالت نے لاہور شہر میں ترقیاتی منصوبے شروع کرنے پر لاہور ڈیولپمنٹ اتھارٹی کے وکیل پر ناراضی کا اظہار کرتے ہوئے کہا کہ نگراں حکومت کو ترقیاتی منصوبے شروع کرنے میں پتا نہیں اتنی کیا جلدی ہے، اسموگ کا سیزن شروع ہوچکا ہے جس کے لیے 6 ماہ قبل تیاری کرنا پڑتی ہے۔
جسٹس شاہد کریم نے ریمارکس دیتے ہوئے کہا کہ اس حکومت کا کیا مسئلہ ہے سمجھ سے باہر ہے، 4 ماہ رک نہیں سکتے، جو کام کرنے والے ہیں وہ ہو نہیں رہے اتنے منصوبوں کے لیے اربوں روپے پتہ نہیں کہاں سے آرہے ہیں۔
اسموگ کے تدارک کے ضمن میں شہر میں بڑھتے ہوئے ٹریفک کے مسائل کے حل کے لیے غلط جگہ گاڑیاں پارک کرنے پر 5 ہزار روپے جرمانہ عائد کرنے کی ہدایت کی ہے۔
جوڈیشل واٹر کمیشن نے عدالت میں پیش کردہ اپنی سفارشات میں موٹر سائیکل سوار کو ہیلمٹ نہ پہننے پر 2 ہزار روپے جرمانہ بڑھانے کی تجویز دی ہے۔
