اسرائیل کے بائیں بازو کے رکن پارلیمنٹ اوفر کاسف نے کہا ہے کہ اسرائیل کی بنیامین نیتن یاہو حکومت نسل کشی پر کام کر رہی ہے اور اسرائیل کی فاشسٹ حکومت فلسطینیوں کے قتل عام کی حمایت کرتی ہے۔ نیتن یاہو سے کہا تھا کہ فلسطینیوں کے ساتھ روا رکھا جانے والا سلوک نہ بدلا تو صورت حال خراب ہو سکتی ہے۔
بائیں بازو کے اسرائیلی رکن اسمبلی اوفر کاسف نے عرب میڈیا سے گفتگو کرتے ہوئے بتایا کہ بنیامین نیتن یاہو کی اسرائیلی حکومت کو فلسطینی حملوں سے متعلق خبردار کیا تھا اور یہ بھی بتایا تھا کہ فلسطینی سرزمین پرغیر قانونی قبضے کے نتیجے میں اسرائیل پر حملے کیے جا سکتے ہیں۔
انہوں نے کہا کہ حکومت سے کہا تھا کہ فلسطینیوں سے روا سلوک نہ بدلا گیا تو صورت حال خراب ہو سکتی ہے۔ ہم معصوم شہریوں کے خلاف حملوں، جارحیت کی مخالفت کرتے ہیں جب کہ اسرائیل کی فاشٹ حکومت فلسطینیوں کے قتل عام کی حمایت کرتی ہے۔
ان کا مزید کہنا تھا کہ اسرائیلی حکومت نسل کشی پر کام کر رہی ہے۔ اسرائیلی وزیراعظم کواسرائیلی شہریوں کی جانوں کی بھی پروا نہیں ہے۔ وزیراعظم نیتن یاہو صرف اپنے مفاد کے لیے کام کر رہے ہیں۔