قومی کرکٹ ٹیم کے سابق کپتان شعیب ملک نے کہا کہ پی ایس ایل میں ایسے دو میچز ہیں جو ہمیں جیتنے چاہیے تھے، دو میچز کی شکست مجھے انفرادی طور پر بہت چبھ رہی ہے۔
گزشتہ روز ملتان میں میڈیا سے گفتگو کرتے ہوئے شعیب ملک نے کہا کہ آخری میچ کی جیت سے ہمیں بہت اعتماد ملا ہے، میری کوشش ہے کہ جو مجھے رول دیا جائے اس کے مطابق کھیلوں۔
انہوں نے کہا کہ لاہور قلندرز کی ٹیم مضبوط ہے ، شاہین آفریدی ، حارث رؤف اور زمان خان کی وجہ سے بولنگ مضبوط ہے، لاہور قلندرز کے خلاف جیت سے اعتماد میں اضافہ ہوا ہے۔
شعیب ملک کا کہنا ہے کہ ملتان سلطانز کی ٹیم ہوم گراؤنڈ پر اچھا کھیل رہی ہے، کمزوریوں سے فائدہ اٹھانے کی کوشش کریں گے، ملتان کے پاس نوجوان فاسٹ بولرز اچھے ہیں، بولرز کو انٹرنیشنل کرکٹ کھلانے میں جلدی نہیں کرنی چاہیے۔
انہوں نے کہا کہ نوجوان فاسٹ بولرز کو ابھی دو تین سال کھیل کر تجربہ حاصل کرنے دیں، ان باولرز کی اوسط سپیڈ چار اوورز کی بجائے دس اوورز تک ہونی چاہیے، نئے بولرز کو جلد مت کھلائیں انٹرنیشنل کرکٹ کا ماحول الگ ہوتا ہے۔