نگران وفاقی وزیر انفارمیشن ٹیکنالوجی ڈاکٹر عمر سیف نے کہا کہ وفاقی کابینہ نے 5G ٹیکنالوجی اسپیکٹرم کی نیلامی کی منظوری دے دی ہے۔
ڈاکٹرعمر سیف نے آج ایک بیان میں بتایا کہ نگراں وزیرخزانہ کی سربراہی میں اسپیکٹرم نیلامی ایڈوائزری کمیٹی قائم کردی گئی ہے، کمیٹی میں وزیرآئی ٹی ٹیلی کمیونیکیشن و سائنس و ٹیکنالوجی اور وزیرصنعت و پیداوارممبرز ہوں گے۔
انہوں نے کہا کہ 5G اسپیکٹرم کی نیلامی کے لیے 300 میگاہرڈز اسپیکٹرم دستیاب ہوگا، اس سلسلہ میں جلد ہی پی ٹی اے کے ذریعے کنسلٹنٹ کا تعین کرکےاسپیکٹرم نیلامی کو یقینی بنایا جائےگا۔
انہوں نے کہا کہ کابینہ نے ٹیلی کام انفراسٹرکچر شیئرنگ کی منظوری بھی دے دی ہے۔ 5G اسپیکٹرم نیلامی کے حوالے سے انفراسٹرکچر شیئرنگ ٹیلی کام کمپنیوں کے لیے بزنس فرینڈلی ماحول کو ساز گار بنائے گا۔
نگران وزیر نے کہا کہ انفراسٹرکچرشیئرنگ سے ٹیلی کام کمپنیاں ایک دوسرے کےٹاورزپر آلات لگا کراستعمال کرسکیں گی اور ان کے آپریشنل اورمینٹیننس اخراجات میں نمایاں کمی ہوگی، نئے ٹاورزکی تنصیبات میں اربوں روپےکی بچت سے رقم اپ گریڈیشن میں استعمال کی جاسکے گی۔
