الخدمت فاؤنڈیشن پاکستان کے صدر ڈاکٹرحفیظ الرحمن نے کہا ہے کہ الخدمت کا بین الاقوامی رفاہی اداروں کے اشتراک سے 7 اکتوبر سے غزہ میں ریلیف آپریشن جاری ہے، الخدمت فاؤنڈیشن کے تحت غزہ میں اب تک 15 کروڑ روپے کا امدادی سامان فراہم کیا جا چکا ہے اور اس مقصد کے لیے مزید 50 کروڑ روپے مختص کر دیے گئے ہیں۔
ڈاکٹر حفیظ الرحمٰن نے کہا کہ غزہ اس وقت شدید انسانی بحران کا شکار ہے جہاں پانی، خوراک اور طبی امداد کی اشد ضرورت ہے، الخدمت نے فوری طورپر غزہ میں موجود بین الاقوامی رفاہی اداروں کے اشتراک سے میسر و موجود وسائل کو بروئے کار لاتے ہوئے امدادی سرگرمیوں کا آغاز کیا، اس سلسلے میں اسپتالوں میں زیرعلاج مریضوں اور اسکولوں میں قائم کیمپوں میں پکے پکائے کھانے اور موسمی اثرات سے بچاؤ کے لیے ونٹر پیکج کی تقسیم کا کام جاری ہے، اِسی طرح آبادیوں میں خشک راشن تقسیم کیا جا رہا ہے اور ابتدائی طور پر ہسپتالوں کو ادویات کی فراہمی کی گئی ہے۔
انہوں نے کہا کہ غزہ کے محاصرے کے باعث فی الحال غزہ کے اندر سے دستیاب امدادی سامان کے ذریعے ریلیف کا کام جاری ہے، اس کے علاوہ الخدمت فاؤنڈیشن بین الاقوامی اداروں کے ذریعے امدادی سامان رفح بارڈر پر پہنچا چکی ہے جہاں رفاہ بارڈر کچھ وقت کے لیے بھی کھلا تو امدادی سامان کے ٹر ک متاثرہ علاقوں تک پہنچ جائیں گے۔ ڈاکٹرحفیظ الرحمن نے کہا کہ متاثرہ علاقے میں قائم ترکش فرینڈ اسپتال میں موجود ایک ترک ڈاکٹر نے بتایا کہ اسپتال میں صرف 24 گھنٹے کا ایندھن باقی رہ گیا ہے جس کے ختم ہوتے ہی طبی خدمات بند ہوجائیں گی۔
ڈاکٹر حفیظ الرحمن نے کہا کہ الخدمت کی خدمات کو اندرون و بیرون ملک قدر کی نگاہ سے دیکھا جاتا ہے، جب بھی مصیبت کی گھڑی میں الخدمت نے اپیل کی، درد دل رکھنے والے خواتین و حضرات نے دل کھول کر عطیات دیے۔ ہمیں امید ہے کہ پاکستانی قوم فلسطینیوں کی مدد کے لیے آگے بڑھے گی، دیگر این جی اوز اور ادارے ہمارے ساتھ مل کرکام کرنا چاہیں تو ہم ایک دوسرے کے دست و بازو بن کر نازک ترین حالات میں متاثرہ فلسطینی عوام کی خدمت کر سکتے ہیں۔
دوسری جانب غزہ میں امدادی سامان پہنچا نے کے لیے رفح کراسنگ بارڈر کو کھول دیا گیا ہے اور امدادی سامان کے ٹرک مصر سے رفح بارڈر کراسنگ کے ذریعے غزہ کی پٹی میں داخل ہونا شروع ہو گئے ہیں۔
واضح رہے کہ غزہ میں جاری اسرائیلی حملوں میں 15 سو سے زائد بچوں سمیت 4 ہزار 300 سے زائد فلسطینی شہید جبکہ تقریباً 14 ہزار زخمی ہو چکے۔ غزہ پٹی پر اسرائیلی بمباری میں ہزاروں مکانات تباہ ہوچکے جس کے نتیجے میں بے گھر ہونے والے فلسطینیوں کی تعداد 10 لاکھ تک پہنچ گئی ہے۔
