سائفر کیس میں عمران خان کو کتنی سزا ہو سکتی ہے؟

سابق وزیراعظم و چیئرمین پاکستان تحریک انصاف عمران خان اور سابق وزیرخارجہ شاہ محمود قریشی پر سائفر کیس میں فرد جرم عائد ہوچکی ہے۔ آفیشل سیکرٹ ایکٹ کے تحت قائم اسلام آباد کی خصوصی عدالت کے جج ابوالحسنات محمد ذوالقرنین نے پیر کو اڈیالہ جیل میں عمران خان اور شاہ محمود قریشی پر فرد جرم عائد کرتے ہوئے ٹرائل کا باقاعدہ کا آغاز کر دیا۔

عدالت کی جانب سے ملزمان کو چارج شیٹ پڑھ کر سنائی گئی اور آئندہ سماعت پر گواہان کو طلب کر لیا گیا ہے۔

عمران خان اور شاہ محمود قریشی پر الزامات کیا ہیں؟

سائفر کیس میں چیئرمین پی ٹی آئی عمران خان اور شاہ محمود قریشی کے خلاف چارج شیٹ کے مطابق دونوں کو آفیشل سیکرٹ ایکٹ کی دفعہ 5 اور 9 کے تحت ملزم ٹھہرایا گیا ہے۔

کیس کی چارج شیٹ میں الزامات عائد کیے گئے ہیں کہ چیئرمین پی ٹی آئی عمران خان نے بطور وزیراعظم غیر قانونی طور پر سائفر اپنے پاس رکھا۔ عمران خان نے سیکرٹ دستاویز کو ممنوع مقام (جلسے میں) غلط طریقہ کار سے استعمال کیا۔ سائفر کی خفیہ معلومات کو غیر ضروری افراد تک پہنچایا۔

عمران خان کو 2 سال تک قید کی سزا ہو سکتی ہے، عمران شفیق

سینیئر قانون دان اور سابق پراسیکیوٹر نیب عمران شفیق کے مطابق آفیشل سیکرٹ ایکٹ کے سیکشن 5 اور سیکشن 9 کے تحت سزا 14 سال تک قید یا سزائے موت تک کی ہے تاہم عمران خان پرجو جرم ثابت ہوتا ہے اس کی سزا پاکستان کے قانون کے مطابق 2 سال تک ہی ہوسکتی ہے۔

عمران شفیق کے مطابق 14 سال قید یا سزائے موت آفیشل سیکرٹ ایکٹ کے تحت تب بنتی ہے جب سائفر کا کوڈ کسی کو فراہم کیا گیا ہو جبکہ عمران خان پر الزام ہے کہ انہوں نے سائفر کا متن جلسے میں بتایا اور سائفر کو چھپایا گیا ہے۔

عمران شفیق کے مطابق اس چیز کا ثبوت موجود نہیں کہ عمران خان نے کسی کو سائفر کا کوڈ بتایا ہے، ’صرف سائفر کا متن وہ بھی سچ اور جھوٹ کا ملغوبہ ہے اس لیے آفیشل سیکرٹ ایکٹ کا اطلاق ہی نہیں ہوتا ان کو 2 سال تک سزا ہوسکتی ہے‘۔

سائفر کو چھپانے سے متعلق جرم پر عمران شفیق کہتے ہیں کہ سائفر چھپانے کا الزام تب ثابت کیا جاسکتا ہے جب سائفر کہیں سے برآمد کیا جائے یا پھر یہ ثابت کیا جائے کہ عمران خان نے سائفر کسی دشمن ملک کو دیا ہے۔

عمران شفیق نے کہا کہ وزیراعظم آفس کے ڈاکومنٹس کے کسٹوڈین یا تو ملٹری سیکریٹری ہیں یا پھر وزیراعظم کے پرنسپل سیکریٹری، یہ بھی ثابت کرنا ہوگا کہ اس دستاویز کے کسٹوڈین میں عمران خان بھی شامل تھے۔

آفیشل سیکرٹ ایکٹ کا سیکشن 5 اور سیکشن 9 کیا کہتا ہے؟

قانون دان زینب جنجوعہ کے مطابق آفیشل سیکرٹ ایکٹ کا سیکشن 5 متختلف جرائم سے متعلق ہے جس میں معلومات کی ممنوعہ افراد تک رسائی شامل ہے۔ سیکشن 5 کے تحت کسی بھی خفیہ معلومات یا دستاویز وغیرہ کا کسی غیر مجاز شخص کو جان بوجھ کر پہنچانا جرم ہے۔ سیکشن 5(3) کے مطابق کوئی بھی شخص جو سیکشن 5 اے کے تحت کسی جرم کا مرتکب پایا جاتا ہے اسے سزائے موت کے علاوہ 14 سال تک قید کی سزا دی جاسکتی ہے جبکہ اس کے علاوہ کسی بھی سیکشن کے تحت جرم کرنے پر سزا 2 سال کی ہوگی۔

انہوں نے کہا کہ آفیشل سیکرٹ ایکٹ کا سیکشن 9 جرم کی معاونت کرنے سے متعلق ہے اور کوئی بھی شخص جو آفیشل سیکرٹ ایکٹ کی خلاف ورزی کرنے میں معاونت کرے وہ بھی اسی سزا کا ذمہ دار ہوگا جو کہ جرم کی سزا ہوگی۔