انتخابات کے قریب آتے ہی سیاسی صف بندیوں کا آغاز بھی ہو گیا، پاکستان تحریک انصاف (پی ٹی آئی) کی مزید 3 خواتین رہنماؤں نے بھی استحکام پاکستان پارٹی میں شمولیت اختیار کر لی ہے۔
سابق رکن اسمبلی عندلیب عباس، سمیرا بخاری اور سعدیہ سہیل نے استحکام پاکستان پارٹی کے سربراہ جہانگیر ترین سے ملاقات کے دوران آئی پی پی میں شمولیت کا اعلان کیا۔
اس موقع پر استحکام پاکستان پارٹی کی ترجمان فردوس عاشق اعوان نے کہاکہ پی ٹی آئی چھوڑ کر آئی پی پی میں شامل ہونے والی خواتین کو خوش آمدید کہتے ہیں۔
دوسری جانب پی ٹی آئی کی سابق رہنما عندلیب عباس کا کہنا تھا کہ ملک میں جو کچھ 9 مئی کو ہوا نہیں ہونا چاہیے تھا۔ کوئی بھی فردِ واحد مقصد سے بڑا نہیں ہو سکتا۔
واضح رہے کہ 9 مئی کے واقعات کے بعد تحریک انصاف کے متعدد رہنما پارٹی کو خیرباد کہہ چکے ہیں جن میں سے کچھ نے دوسری جماعتوں میں شمولیت اختیار کی اور کچھ نے سیاست کو ہی خیرباد کہہ دیا، اور یہ سلسلہ ابھی تک جاری ہے۔
