چیئرپرسن بینظیر اِنکم سپورٹ پروگرام ڈاکٹر محمد امجد ثاقب نے کہا ہے کہ بینظیر اِنکم سپورٹ مثالی سماجی تحفظ کا پروگرام ہے جو پاکستان بھر میں تقریباً ایک کروڑ غریب گھرانوں کو خدمات فراہم کررہا ہے، بی آئی ایس پی محدود وسائل کے ساتھ ضرورت مند گھرانوں کی دیکھ بھال کر رہا ہے۔
چیئرپرسن بینظیر اِنکم سپورٹ پروگرام ڈاکٹر محمد امجد ثاقب نے گوجرانوالہ کی جامع مسجد عمر دین کا دورہ کیا۔ انہوں نے گوجرانوالہ، گجرات، حافظ آباد اور سیالکوٹ ڈویژنز کی نمائندگی کرنے والے بی آئی ایس پی کے اسٹاف کے ایک اجتماع سے خطاب میں بی آئی ایس پی کی جانب سے ضروت مند گھرانوں کو فراہم کی جانے والی نقد امداد کی اہمیت پر زور دیا۔
ڈاکٹر محمد امجد ثاقب نے کہا کہ بینظیر انکم سپورٹ کی مالی امداد مستحقین کو ضروری گھریلو اخراجات پورا کرنے، اپنے بچوں کی تعلیم میں سرمایہ کاری کرنے اور انہیں خوراک فراہم میں اہم کردار ادا کرتی ہے۔
چیئرپرسن بی آئی ایس پی نے نے اس بات پر زور دیا کہ افراد اکثر ناخواندہ ہوتے ہیں اور بی آئی ایس پی ملازمین کو ہدایت کی کہ وہ ان کی بہترین طریقے سے رہنمائی کریں۔
ڈاکٹر امجد ثاقب نے کہا کہ ’جس شخص نے کسی دوسرے کی جان بچائی تو گویا اس نے پوری انسانیت کو بچایا۔‘
انہوں نے بی آئی ایس پی کو ایک مثالی ادارہ بنانے کے اپنے وژن کا اظہار کرتے ہوئے بی آئی ایس پی کے عملے سے کہا کہ خواتین کے ساتھ عزت اور وقار کے ساتھ پیش آنا مذہبی اور اخلاقی فرض ہے۔
اپنے دورے کے دوران ڈاکٹر ثاقب نے بی آئی ایس پی دفاتر کے اندر صاف ستھرا ماحول برقرار رکھنے، پینے کے صاف پانی کی فراہمی، اور خدمات کے لیے اکثر لمبی قطاروں میں انتظار کرنے والی خواتین کے لیے مناسب پناہ گاہ اور پنکھوں کی دستیابی کو یقینی بنانے کی اہمیت پر بھی زور دیا۔
انہوں نے بی آئی ایس پی کے ملازمین سے پروگرام کے آپریشنز اور خدمات کو بہتر بنانے کے طریقوں کے بارے میں ان کی رائے حاصل کی، جس سے ادارے کی ترقی کے لیے باہمی تعاون کو فروغ دیا جاسکے گا۔
