تحریک انصاف کا ’بلے‘ کا انتخابی نشان جاری نہ کرنے پر مزاحمت کا فیصلہ

پاکستان تحریک انصاف کی کور کمیٹی نے فیصلہ کیا ہے کہ اگر تحریک انصاف کو اگر ’بلّے‘ کے انتخابی نشان سے محروم کرنے کی کوشش کی گئی تو قوم کے ساتھ مل کر آئینی، قانونی، سیاسی اور جمہوری طور پر شدید مزاحمت کی جائے گی۔

پاکستان کو درپیش کثیرالجہتی بحرانوں کا حل شفافیّت، ساکھ اور تمام سیاسی جماعتوں کے لیے حصہ لینے کے مساوی اور یکساں مواقع کے حامل انتخابات میں پوشیدہ ہے۔ پاکستان تحریک انصاف کی کور کمیٹی کا اجلاس پیر کو ہوا ، جس کے بعد اعلامیہ جاری کیا گیا۔

انتخابی ماحول پراگندہ کرنے شدید تحفظات ہیں، پی ٹی آئی

جاری اعلامیے میں کہا گیا ہے کہ ’پاکستان تحریک انصاف کی کورکمیٹی کی انتخابات سے قبل ملک میں انتخابی ماحول پراگندہ کرنے اور سنگین نوعیّت کی ناہمواریاں پیدا کرنے کی ریاستی کوششوں پر شدید تحفّظات کا اظہار کرتی ہے‘۔

الیکشن کمیشن بلے کے انتخابی نشان کا فوری تحریری فیصلہ سنائے

اعلامیے میں کہا گیا کہ الیکشن کمیشن آف پاکستان سے ’بلّے‘ کے انتخابی نشان کے حوالے سے 3 اگست 2023 کے زبانی اعلان کے بعد مفصّل تحریری فیصلے کا بلاتاخیر اجرا کیا جائے۔ کیوں کہ الیکشن کمیشن آف پاکستان کی جانب سے زبانی اعلان کے 87 روز بعد بھی ’بلّے‘ کے انتخابی نشان پر تحریری فیصلے کے اجراء سے گریز عوام میں سنگین نوعیّت کے خدشات اور تحفظات کا باعث بن رہا ہے۔

اعلامیے کے مطابق تکنیکی موشگافیوں کی آڑ میں ’بلّے‘ کے نشان کو بیلٹ پیپر سے ہٹانے یا تحریک انصاف کو اس سے محروم کرنے کی کوشش جمہور کے ووٹ کے حق، انتخاب کی شفافیّت اور جمہوریت کے خلاف ایک گھناؤنی سازش ہوگی جسے قوم کسی طور قبول نہیں کرے گی۔

لاپتہ افراد سے متعلق اختر مینگل کی حمایت کرتے ہیں، پی ٹی آئی

اعلامیے میں کہا گیا ہے کہ پاکستان تحریک انصاف کی جانب سے وفاقی دارالحکومت میں جبری طور پر لاپتہ کیے گئے افراد کی بازیابی کے لیے بلوچستان نیشنل پارٹی کے سربراہ سردار اختر مینگل کے دھرنے کی مکمل حمایت کی جاتی ہے۔

اعلامیے میں مزید کہا گیا کہ دستور کے تابع کسی بھی جمہوری ملک میں ریاست کو یہ حق حاصل نہیں کہ شہریوں کو ماورائے قانون اقدامات کا نشانہ بنائے یا سیاسی اہداف کے حصول کیلئے انہیں جبراً اغواء و لاپتہ کرے۔

تحریک انصاف ملک کے تمام حصوں سے جبری طور پر لاپتہ کئے گئے پاکستانیوں کی فوری بازیابی اور قانون کی حکمرانی کو ریاستی اندازِ کار کی بنیاد بنانے کا مطالبہ کرتی ہے۔

اعلامیے میں جیلوں میں قید بےگناہ کارکنان کے بنیادی دستوری حقوق کے تحفّظ اور ان کی قید سے فوری رہائی کے لیے ہر سطح کی عدالتوں سے فعّال کردار ادا کرنے کی استدعا بھی کی گئی ہے۔

جبر و لاقانونیت کے خلاف نوجوانوں کا کردار قابل ستائش ہے، اعلامیہ

اعلامیے میں کہا گیا ہے کہ کور کمیٹی بدترین فسطائیّت، جبر اور لاقانونیّت کا نہایت جوانمردی سے مقابلہ کرتے ہوئے ملک بھر میں پہلے توہینِ کلامِ پاک اور پھرمظلوم اہلِ فلسطین پر اسرائیل کے انسانیّت سوز مظالم سمیت تمام اہم معاملات پر پرامن احتجاج، مظاہرے، ریلیاں منعقد کرنے والے نوجوان خصوصی خراجِ تحسین کے مستحق ہیں۔

کورکمیٹی کی جانب سے مظلوم اہلِ فلسطین کے حقوق کے تحفظ، اسرائیلی وحشت کی فوری روک تھام اور مسئلے کے مستقل حل کے لیے اہلِ عالم خصوصاً عالمی طاقتوں سے بلاتاخیر کردار ادا کرنے کے مؤقف کا اعادہ  کیا۔

ہندوستان اور اسرائیل جارحیت بند کریں

کور کمیٹی نے اعلامیے میں مزید کہا کہ عالمی طاقتوں کی آشیرباد سے ہندوستان اور اسرائیل جیسی قابض ریاستوں کی مظلوموں کیخلاف انسانیت سوز جارحیّت اور بے انصافیاں نظمِ عالم، عالمی امن اور بنی نوع انسان کے مجموعی مفادات کو ناقابلِ تلافی نقصان پہنچا رہی ہیں۔