سعودی عرب نے غزہ کی پٹی پر ایٹم بم گرانے کے اسرائیلی حکومت کے وزیر کے انتہاپسندانہ بیانات کی شدید مذمت کی ہے۔
سعودی وزارت خارجہ نے ایکس پوسٹ پر جاری پریس ریلیز میں کہا ہے کہ سعودی عرب محصور غزہ پٹی پر ایٹم بم گرانے کے بارے میں اسرائیلی قابض حکومت کے وزیر کے انتہا پسندانہ بیانات کی سخت ترین الفاظ میں مذمت کرتا ہے جو اسرائیلی حکومت کے ارکان میں انتہا پسندی اور بربریت کی شدت کو ظاہر کرتا ہے۔
وزارت خارجہ کا مزید کہنا تھا کہ اسرائیلی وزیر کو فوری طور پر حکومت سے برطرف نہ کرنا اور محض رکنیت کی معطلی تمام انسانی، اخلاقی، مذہبی اور قانونی اقدار کو مکمل طور پر نظر انداز کرنا ہے۔
واضح رہے کہ اسرائیلی وزیر ایمچے ایلیاہو نے ایک انٹرویو میں کہا تھا کہ غزہ پر نیوکلیئر بم گرانا بھی ایک آپشن ہے۔ شدید عالمی رد عمل کے بعد اسرائیلی وزیراعظم نیتن یاہو وزیر کو تاحکم ثانی حکومتی اجلاسوں میں شرکت سے معطل کردیا تھا۔
