بھارت میں جاری آئی سی سی کرکٹ مینز ورلڈ کپ میں بھارت کے ہاتھوں سری لنکا کی 302 رنز کی شرمناک شکست کے بعد وزیر کھیل روشن رانا سنگھے نے سری لنکن کرکٹ بورڈ حکام سے استعفوں کا مطالبہ کیا تھا۔ بورڈ سیکریٹری موہن ڈی سلوا کے استعفیٰ کے اگلے روز ہی وزیر کھیل نے کرکٹ بورڈ کو برطرف کر دیا ہے۔
سری لنکن میڈیا کے مطابق وزیر کھیل روشن رانا سنگھے نے سری لنکا کرکٹ کے لیے عبوری کمیٹی تشکیل دے دی ہے۔ 1996 کا ورلڈ کپ جیتنے والے کپتان ارجنا رانا ٹنگا کو نئے عبوری بورڈ کا چیئرمین مقرر کیا گیا ہے۔ نئے 7 رکنی پینل میں سپریم کورٹ کے ایک ریٹائرڈ جج اور بورڈ کے ایک سابق صدر بھی شامل ہیں۔
سری لنکا کی ٹیم 2 نومبر کو ممبئی میں بھارت کے 358 رنز کے ہدف کا تعاقب کرتے ہوئے 55 رنز پر آؤٹ ہو گئی تھی جو ورلڈ کپ کی تاریخ کا چوتھا سب سے کم اسکور ہے۔ شرمناک شکست کے بعد سری لنکن عوام میں غم و غصے کی لہر دوڑ گئی تھی۔ وزیر کھیل کا کہنا تھا کہ سری لنکن کرکٹ حکام کو عہدے پر رہنے کا کوئی اخلاقی حق نہیں ہے۔انہیں رضاکارانہ طور پر استعفیٰ دے دینا چاہیے۔
سری لنکا کرکٹ کے سیکریٹری موہن ڈی سلوا اس وقت آسٹریلیا میں ہیں، انہیں وہاں دل کی بیماری کی تشخیص ہوئی ہے۔ ڈی سلوا نے اے ایف پی کو بتایا کہ انہوں نے اپنا استعفیٰ آسٹریلیا سے بھجوا دیا ہے۔ ان کا کہنا تھا کہ دل کی بیماری کے بعد انہوں نے عہدے سے مستعفی ہونے کا فیصلہ کیا ہے۔
مزید پڑھیں
موہن ڈی سلوا کا کہنا تھا کہ ان کی صحت کے مسائل، کرکٹ میں تنازعات، تناؤ اور اضطراب کی وجہ سے ان کے اہلخانہ نے عہدہ چھوڑنے کا مشورہ دیا تھا۔
واضح رہے کہ ہفتے کے روز سری لنکن وزیر رانا سنگھے نے انٹرنیشنل کرکٹ کونسل (آئی سی سی) کے مکمل ممبران کو خط لکھا تھا جب کہ مقامی میڈیا کو جاری کیے گئے خط میں کہا تھا کہ سری لنکا کرکٹ کو کھلاڑیوں کے نظم و ضبط کے مسائل، انتظامی و مالی بدعنوانی اور میچ فکسنگ کے الزامات کی شکایات نے گھیر لیا ہے۔ رانا سنگھے کے خط پر آئی سی سی کی جانب سے کوئی ردعمل سامنے نہیں آیا ہے۔
یاد رہے کہ سری لنکن کابینہ کے وزیر پرسنا رانا ٹنگا جو نئی عبوری کمیٹی کے چیئرمین اور ورلڈ کپ جیتنے والے کپتان ارجنا رانا ٹنگا کے بھائی ہیں نے اگست 2023 میں پارلیمنٹ میں تقریر کرتے ہوئے کہا تھا کہ 1996 کی فتح ہماری کرکٹ کے لیے سب سے بڑی لعنت تھی کیونکہ اس کے بعد کرکٹ بورڈ میں پیسہ آنا شروع ہوا اور اس کے ساتھ ہی وہ لوگ آئے جو کرپشن کرنا چاہتے تھے۔
