ضلع خیبر کے علاقے وادی تیراہ میں دہشت گردوں کی فائرنگ میں شہید ہونے والے پاک فوج کے لیفٹیننٹ کرنل محمد حسن حیدر کی نماز جنازہ چکلالہ گیریژن میں ادا کر دی گئی۔
پاک فوج کے شعبہ تعلقات عامہ (آئی ایس پی آر) کے مطابق شہید کی نماز جنازہ میں نگراں وزیراعظم انوارالحق کاکڑ، وزیر دفاع، چیئرمین جوائنٹ چیفس آف اسٹاف کمیٹی، آرمی چیف سمیت بڑی تعداد میں سول و فوجی افسران، شہریوں اور ان کے رشتہ داروں نے شرکت کی۔
شہید فوجی آفیسر کو مکمل فوجی اعزاز کے ساتھ سپرد خاک کیا گیا، لیفٹیننٹ کرنل محمد حسن کی عمر 42 سال تھی اور وہ ڈی ایچ اے ٹو اسلام آباد میں رہائش پذیر تھے۔
دوسری جانب لکی مروت سے تعلق رکھنے والے 31 سالہ نائیک خوشدل خان، چارسدہ سے تعلق رکھنے والے 27 سالہ نائیک رفیق خان اور مری سے تعلق رکھنے والے 33 سالہ لانس نائیک عبدالقادر کی نماز جنازہ بھی ان کے آبائی علاقوں میں ادا کر دی گئی۔
آئی ایس پی آر کے مطابق پاکستان کی مسلح افواج ملک سے دہشت گردی کے ہر قیمت پر خاتمہ کے لیے پُرعزم ہیں۔
