ٹیکنالوجی کمپنی میٹا نے سیاسی ایڈورٹائزرز کو اپنے نئے آرٹیفیشل انٹیلیجنس ٹولز کے استعمال سے روکنے کا فیصلہ کیا ہے۔
غیرملکی میڈیا رپورٹس کے مطابق میٹا نے یہ فیصلہ ٹیکنالوجی کے ممکنہ خطرات کو محدود کرنے کے لیے کیا ہے، اس فیصلہ کے بعد سیاسی ایڈورٹائزرز کو میٹا کے ایسے اے آئی ٹولز استعمال کرنے کی اجازت نہیں ہوگی جو برانڈز کو ٹیکسٹ، پس منظر اور دیگر مارکیٹنگ مواد تیار کرنے میں مدد کرتے ہیں۔
مزید پڑھیں
اس حوالے سے میٹا کے ترجمان کا کہنا ہے کہ میٹا نے اشتہاری ٹولز سے متعلق اپنی پالیسیوں کو اپ ڈیٹ کر دیا ہے تاکہ ان کے استعمال کے ذریعے ایسی اشتہاری کمپینز نہ بنائی جاسکیں جن کا تعلق انتخابات، سیاست اور سماجی مسائل سے ہو سکتا ہے۔ انہوں نے مزید بتایا کہ یہ پابندیاں ہاؤسنگ، ایمپلائمنٹ یا کریڈٹ، صحت، فارماسیوٹیکل یا مالیاتی خدمات سے متعلقہ اشتہارات پر لاگو ہوں گی۔
میٹا کا کہنا ہے، ’ہمیں یقین ہے کہ یہ نقطہ نظر ہمیں ریگولیٹ کی جانے والی انڈسٹری میں حساس موضوعات سے متعلقہ اشتہارات سے درپیش ممکنہ خطرات کو بہتر طور پر سمجھنے اور اشتہارات میں جنریٹواے آئی کے استعمال کے لیے درست حفاظتی اقدامات کرنے میں مدد دے گا۔
زیر بحث اے آئی خصوصیات میں ایک ایسا ٹول شامل ہے جو مشتہرین کے ذریعے اپ لوڈ کردہ مواد میں خود بخود تبدیلیاں تجویز کر سکتا ہے اور جو اشتہار کی اثرانگیزی کو بہتر بنانے کی صلاحیت رکھتا ہے، مثال کے طور پر یہ رضاکارانہ طور پر موسیقی کی تجاویز دے سکتا ہے یا اپ لوڈ کردہ تصاویر پر 3D متحرک تصاویر کا اطلاق کر سکتا ہے۔
خیال رہے کہ ستمبر میں امریکی سینیٹرز کے ایک دو طرفہ گروپ نے سیاسی اشتہارات میں نام نہاد اے آئی ڈیپ فیکس کے استعمال پر پابندی کے لیے قانون سازی متعارف کرائی تھی اور اگست میں وفاقی الیکشن کمیشن نے ایک ایسا عمل شروع کیا تھا جو بالآخر سیاسی اشتہارات میں اے آئی کے استعمال کو ریگولیٹ یا ممنوع قرار دے سکتا ہے۔
یہ پابندیاں ایسے وقت عائد کی جارہی ہیں جب پالیسی سازوں اور سول سوسائٹی کے گروپوں نے خبردار کیا ہے کہ اے آئی سے تیار کردہ مواد ووٹروں کو گمراہ کر کے جمہوری عمل کو تباہ کر سکتا ہے۔
