پاکستان نے یوکرین کو اسلحہ فراہم نہیں کیا، دفتر خارجہ

پاکستان نے ایک بار پھر یوکرین کے تنازعہ کے مذاکراتی حل کی ضرورت پر زور دیتے ہوئے واضح کیا ہے کہ اس نے نہ تو یوکرین کو اسلحہ فراہم کیا ہے اور نہ ہی اس کا ایسا کوئی ارادہ ہے۔

دفتر خارجہ کی ترجمان ممتاز زہرہ بلوچ نے بدھ کو میڈیا کے سوالات کے جواب میں یوکرین کے تنازعہ کے مذاکراتی حل کی ضرورت پر زور دیا اور کہا کہ پالیسی کے لحاظ سے پاکستان تنازعات کے شکار خطے کو ہتھیار فراہم نہیں کرتا۔ ترجمان نے کہا کہ اس نے نہ تو یوکرین کو اسلحہ فراہم کیا ہے اور نہ ہی اس کا ارادہ ہے۔

انہوں نے کہا کہ یہی وجہ ہے کہ پاکستان اور یوکرین کے وزرائے دفاع کے درمیان اس موضوع پر 7 نومبر کو ٹیلی فون پر بات چیت کے دوران بات نہیں کی گئی۔

واضح رہے کہ یوکرین کے وزیرخارجہ دیمترو کولیبا نے رواں سال جولائی میں پاکستان کا دورہ کیا تھا۔ اپنے 2 روزہ دورے کے دوران ایک نجی ٹی وی چینل پر انٹرویو میں اعتراف کیا تھا کہ یوکرین پاکستان سے کسی قسم کا کوئی اسلحہ نہیں لے رہا۔