صدر مملکت ڈاکٹر عارف علوی اور نگراں وزیراعظم انوار الحق کاکڑ کی جانب سے شاعر مشرق اور عظیم مفکر ڈاکٹر علامہ محمد اقبال کو ان کے 146ویں یوم پیدائش پر شاندار خراج عقیدت پیش کیا گیا ہے۔ دونوں سربراہوں نے الگ الگ پیغامات میں کہا کہ ڈاکٹر علامہ اقبال محمد اقبال ایک عظیم مفکر اور برصغیر کے مسلمانوں کے لیے محسن تھے جنہوں نے علیحدہ وطن کا تصور پیش کیا اور ان کا یہ خواب حقیقت میں بدل گیا۔
صدر مملکت ڈاکٹر عارف علوی کا پیغام
صدر مملکت ڈاکٹر عارف علوی نے اپنے پیغام میں کہا کہ اقبال ایک عظیم مفکر تھے جنہوں نے اپنی تحریروں اور شاعری کے ذریعے مسلمانوں میں اتحاد کا جذبہ بسایا۔
انہوں نے کہا کہ پاکستان کو ایک خوشحال ملک بنانے کے لیے ہمیں علامہ اقبال کی اسلام اور ان کے فلسفہ خودی پر عمل کرنا ہوگا جو عزت نفس اور انسانی وقار کے فروغ پر یقین رکھتا ہے۔
مزید پڑھیں
نگراں وزیر اعظم انوار الحق کاکڑ
نگراں وزیر اعظم انوار الحق کاکڑ نے یوم اقبال پر اپنے پیغام میں کہا کہ ڈاکٹر علامہ محمد اقبال نے برصغیر کے مسلمانوں میں ان کے بنیادی حقوق کا شعور بیدار کیا جس سے مسلمانوں میں اتحاد کا جذبہ پیدا ہوا۔
انہوں نے کہا کہ علامہ اقبال کا فلسفہ خودی دنیا و آخرت کی کامیابی کے لیے انسانیت کے لیے ایک منفرد تبدیلی ہے۔
انوار الحق کاکڑ نے کہا کہ علامہ محمد اقبال نے امن، سیاسی رواداری اور بھائی چارے کا ملک پاکستان کا خواب دیکھا تھا۔
نگراں وزیراعظم نے نوجوانوں پر زور دیا کہ وہ علامہ محمد اقبال کے تصور کے مطابق مثبت اور ترقی پسند سوچ کے ساتھ ملک کی خدمت اور ترقی میں کلیدی کردار ادا کریں۔
مزار اقبال پر گارڈز کی تبدیلی
یاد رہے کہ شاعر مشرق اور عظیم مفکر ڈاکٹر علامہ محمد اقبال کا 146 واں یوم پیدائش آج منایا جا رہا ہے، جس کے پیش نظر مزار اقبال پر گارڈز کی تبدیلی کی پروقار تقریب کا انعقاد بھی کیا گیا ہے۔
مفکرِ پاکستان ڈاکٹرعلامہ محمد اقبال کے یومِ ولادت کے موقع پر مزارِ اقبال پر پرُوقار تبدیلی گارڈ کی تقریب منعقد ہوئی جہاں پاک بحریہ کے چاق و چوبند دستے نے اعزازی گارڈ کے فرائض سنبھالے جبکہ پاکستان نیوی کے اسٹیشن کمانڈر لاہور کموڈور ساجد حسین تقریب کے مہمان خصوصی تھے۔
گارڈز کی تعیناتی کے بعد قومی شاعر کے مزار پر گورنر پنجاب محمد بلیغ الرحمان، امیرالبحر ایڈمرل نوید اشرف، پاک بحریہ کے افسران، سیلرز اور نیوی سویلینز کی جانب سے پھولوں کی چادر چڑھائی گئی۔
