آئی سی سی کرکٹ ورلڈ کپ اس وقت انڈیا میں جاری ہے جہاں پاکستان کرکٹ ٹیم تقریبا اس ورلڈ کپ سے باہر ہو چکی ہے۔ ورلڈ کپ کے دوران ہی جہاں پاکستان کرکٹ ٹیم بری پرفارمنس ایک مسئلہ رہی وہیں آف فیلڈ بھی بہت سے مسائل درپیش رہے جس میں کبھی ڈریسنگ روم میں لڑائی کی خبریں تو کبھی کپتان بابر اعظم اور مینجمنٹ کمیٹی کے درمیان تنازعات کی خبریں سوشل میڈیا کی زینت بنی رہیں۔
مایوس کن کارگردگی اور انتظامی مسائل سے دوچار پاکستان کرکٹ کے شائقین کو دھچکا اس وقت لگا جب چیف سیلکٹر انضمام الحق بھی ٹورنامنٹ کے دوران ہی اپنے عہدے سے مستعفی ہوگئے۔
اسی سب کے دوران جہاں باقی سوشل میڈیا صارفین نے تبصرے کیے وہیں ملکی اور غیر ملکی سابق کھلاڑیوں نے تبصروں کا بازار گرم رکھا۔ سابق کپتان محمد حفیظ اور سابق انگلش کپتان مائیکل وان کے درمیان بھی سماجی رابطے کی ویب سائٹ ایکس پر اسی دوران ایک لفظی جنگ چھڑ گئی۔
ہوا کچھ یوں کہ 4 نومبر کو بنگلورو میں نیوزی لینڈ کے خلاف پاکستان کے میچ سے ایک دن پہلےمائیکل وان نے ایک ٹویٹ پوسٹ کی جس میں کپتان بابر اعظم کے واٹس ایپ چیٹ لیک اسکینڈل اور انضام الحق کے مستعفی ہونے پر طنز کرتے ہوئے لکھا کہ مجھے بہت فکر ہورہی ہے ، پاکستان میں سب بہت پرسکون ہیں ، ان کی اچھی پرفامنس کے لیے کسی کا مستعفی ہونا یا چیٹ لیک ہونا ضروری ہے۔
I worry about Pakistan tomorrow .. it’s been too calm this last couple of days .. they need someone to resign today or leak a what’s app message .. #CWC23 #Pakistan 😜 https://t.co/OWzF81WFEp
— Michael Vaughan (@MichaelVaughan) November 3, 2023
مائیکل وان کی ٹویٹ کے جواب میں محمد حفیظ نے سابق انگلش کپتان کو مشورہ دیا کہ وہ پاکستان کے بجائے انگلینڈ ٹیم کے مسائل پر توجہ دیں۔ انہوں نے ای سی بی کی جانب سے سنٹرل کنٹریکٹ اسنب پر ڈیوڈ ولی کے تبصروں کا حوالہ دیا جس کی وجہ سے انہوں نے ورلڈ کپ کے دوران ہی بین الاقوامی کرکٹ سے ریٹائرمنٹ کا اعلان کر دیا۔
محمد حفیظ نے لکھا بہتر ہے کہ دوسروں کے مسائل میں جھانکنا بند کریں اور پہلے اپنے تنازعات کو حل کریں۔ ہمیں اپنے مسائل کا پتا ہے اور انہیں ضرور حل کریں گے۔
Better stop peeping into other’s problem and sort out ur disputes first. We have sizeable insight about our issues and will surely resolve them. @MichaelVaughan pic.twitter.com/744fItqJsz
— Mohammad Hafeez (@MHafeez22) November 3, 2023
ان ٹویٹس کے بعد 5 نومبر کو بھارت نے کولکتہ کے ایڈن گارڈنز میں جنوبی افریقہ کو شکست دی جہاں ویرات کوہلی نے اپنی 35 ویں سالگرہ پر 49 ویں ون ڈے سنچری بنائی۔
ایڈن گارڈنز میں ویرات کوہلی 121 گیندوں پر 101 رنز بنا کر ناٹ آؤٹ رہے، جو ون ڈے میں ان کا سب سے کم اسٹرائیک ریٹ کے ساتھ 100 پلس اسکور ہے۔ صارفین کا کہنا تھا کہ ویرات کوہلی نے جان بوجھ کر سست کھیلا کیونکہ ان کا مقصد اپنی سنچری اسکور کرنا تھا اور ٹیم کے اسکور سے ان کو کوئی فرق نہیں پڑتا ، تنقید کرنے والوں میں محمد حفیظ بھی شامل تھے۔
اسی حوالے سے نجی ٹی وی سے گفتگو کرتے ہوئے محمد حفیظ نے کہا کہ انہیں ویرات کوہلی کی بیٹنگ میں خود غرضی نظر آئی۔ مائیکل وان نے ان کے تبصروں کا جواب دیتے ہوئے کہا کہ یہ “بالکل بکواس” ہے۔
Come on @MHafeez22 !!! India have hammered 8 teams playing great cricket .. @imVkohli now has 49 tons and his last was an anchor role innings on a tricky pitch .. His team won by over 200 !!!! This is utter nonsense .. #CWC2023 #India #Pakistan https://t.co/Foh3hhz3RE
— Michael Vaughan (@MichaelVaughan) November 7, 2023
بات یہی ختم نہیں ہوئی بلکہ یہ لفظی جنگ شدت اختیار کر گئی، جب انگلش کھلاڑی بین اسٹوکس نے 8 نومبر کو نیدرلینڈز کے خلاف 84 گیندوں پر 108 رنز بنا کر ورلڈ کپ میں اپنی پہلی سنچری بنائی تو محمد حفیظ نے اسے مائیکل وان پر تنقید کرنے کا ایک اور موقع سمجھا اور ایک ٹویٹ میں مائیکل وان کو ٹیگ کرتے ہوئے لکھا کہ جنوبی افریقہ کے خلاف کوہلی کی سنچری اور بین سٹوکس کی اننگز خود غرض اور بے لوث اننگز میں فرق کرنے کی بہترین مثال ہے۔
مائیکل وان نے بین سٹوکس کے سنچری کے معیار پر ان سے اتفاق کیا لیکن وہ پھر بھی ویرات کوہلی کا دفاع کرتے رہے اور کہا ویرات کی سنچری ایک اچھے بولنگ اٹیک کے خلاف مشکل حالات میں آئی۔
Great innings from Stokesy @MHafeez22 .. As was Virats on a difficult pitch in Kolkata against a better attack .. 👍 https://t.co/KFpNIafgVK
— Michael Vaughan (@MichaelVaughan) November 8, 2023
بین اسٹوکس کے حوالے سے محمد حفیظ کی پوسٹ کا جواب دینے کے چند گھنٹے بعد مائیکل وان نے ایک اور ٹویٹ پوسٹ کیا جس میں 2012 میں ٹی ٹوئنٹی ورلڈ کپ کے ایک میچ میں حفیظ کو ویرات کوہلی نے آؤٹ کیا اور لکھا مارننگ ، امید ہے اب آپ کا دن اچھا گزرے گا۔
Morning @MHafeez22 .. Have a great day 😜😜 #India #Pakistan pic.twitter.com/WtK62Lvf01
— Michael Vaughan (@MichaelVaughan) November 9, 2023
سابق انگلش کپتان مائیکل وان اور محمد حفیظ کے درمیان یہ طنزیہ جنگ تو اس وقت جاری ہے جو نہ جانے کب ختم ہوگی لیکن صارفین کا کہنا ہے کہ دونوں سابق کھلاڑیوں کو اس بات کا خیال رکھنا چاہیے کہ وہ کافی عرصے تک اپنے ملک کی نمائندگی کرچکے ہیں اور وہ یہ بالکل نہیں چاہتے ہوں گے کہ ایسے سوشل میڈیا پر ان کا مذاق بنے۔
