لاہور ہائیکورٹ نے توہین الیکشن کمیشن کیس میں جیل ٹرائل کے خلاف چیئرمین پی ٹی آئی کی درخواست فل بینچ میں پیش کرنے کی سفارش کی ہے۔
لاہور ہائیکورٹ کی جسٹس عالیہ نیلم نے چیئرمین پی ٹی آئی کی توہین الیکشن کمیشن میں جیل ٹرائل کے خلاف درخواست پر سماعت کی۔ عدالت نے کہا کہ اس نوعیت کی درخواست فل بینچ کے روبرو بھی زیرسماعت ہے، اب تک کتنے کیسز میں جیل ٹرائل کا نوٹیفکیشن ہوچکا ہے؟ اس پر درخواست گزار کے وکیل اشتیاق اے خان نے بتایا کہ سائفر اور القادر ٹرسٹ سے متعلق مقدمات میں جیل ٹرائل کا نوٹیفکیشن ہوا ہے۔
عدالت نے استفسار کیا کہ کیا آپ نے وہ تمام ریکارڈ درخواست کے ساتھ لگایا ہے، ہم ایک مقدمے میں حکم دیں تو باقیوں پر کیا اثر ہوگا، آپ تمام ریکارڈ فراہم کریں۔ عدالت کی ہدایت پر چیئرمین پی ٹی آئی کے وکیل نے کہا کہ الیکشن کمیشن 13 دسمبر کو جیل ٹرائل کے لیے پہنچ جائے گا۔
مزید پڑھیں
جسٹس عالیہ نیلم نے کہا کہ آپ کے پاس 100 وکلا کی ٹیم ہے، فوری ریکارڈ منگوا کر ساتھ لگا دیں۔ وکیل نے کہا کہ ہم ریکارڈ فراہم کر دیتے ہیں آپ درخواست کو کل کے لیے مقرر کردیں۔ عدالت نے کہا کہ آپ متفرق درخواست کے ذریعے تمام دستاویزات لف کردیں پھر دیکھتے ہیں۔
عدالت نے چیئرمین پی ٹی آئی کی درخواست فل بینچ میں پیش کرنے کی سفارش کرتے ہوئے چیف جسٹس کو بھجوادی جب کہ عدالت نے جیل ٹرائل سے متعلق ریکارڈ درخواست کے ساتھ لگانے کی ہدایت کی ہے۔