پاکستان الیکشن کمشن نے اراکین پارلیمنٹ و صوبائی اسمبلی ممبران کے اثاثوں اور واجبات کے گوشوارے برائے مالی سال 2022-23 کے جمع کروانے کی حتمی تاریخ 31 دسمبر 2023 مقرر کردی۔
الیکشن کمیشن کے اعلان کے مطابق الیکشن ایکٹ 2017 کی دفعہ 137 کے تحت تمام اراکین پارلیمنٹ و صوبائی اسمبلی کے ممبران کے لیے لازم ہے کہ وہ اپنے، شریک حیات اور زیر کفالت بچوں کے اثاثوں اور واجبات کے گوشوارے برائے مالی سال 2022-23 مجوزہ فارم ’بی‘ کی صورت میں مقررہ تاریخ سے پہلے یا 31 دسمبر 2023 تک الیکشن کمیشن کے پاس جمع کروا دیں۔
پریس ریلیز میں کہا گیا ہے کہ اس حوالے سے تیار کردہ ہدایات / رہنمائی کے ساتھ مقررہ فارم۔بی الیکشن کمیشن سیکریٹریٹ اسلام آباد، متعلقہ صوبائی الیکشن کمشنر کے دفاتر، سینٹ سیکرٹریٹ، قومی و صوبائی اسمبلیوں کے سیکریٹریٹ سے مفت حاصل کیا جا سکتا ہے۔ مزید برآں فارم ’بی‘ الیکشن کمیشن آف پاکستان کی ویب سائٹ سے بھی ڈاؤن لوڈ کیا جا سکتا ہے۔
