سپریم کورٹ نے آر اوز، ڈی آر اوز سے متعلق لاہور ہائیکورٹ کا فیصلہ معطل کر دیا

سپریم کورٹ آف پاکستان نے ریٹرننگ افسران اور ڈسٹرکٹ ریٹرننگ افسران سے متعلق لاہور ہائیکورٹ کا فیصلہ کالعدم قرار دیتے ہوئے الیکشن کمیشن کو آج ہی انتخابی شیڈول جاری کرنے کا حکم دیا ہے۔

جمعہ کوچیف جسٹس آف پاکستان، جسٹس قاضی فائز عیسیٰ کے ساتھ چیف الیکشن کمشنر کی ملاقات کے بعد الیکشن کمیشن آف پاکستان نے پی ٹی آئی کی درخواست پر آراوز اور ڈی آراوز کی تعیناتی کو کالعدم قرار دیے جانے کے لاہور ہائیکورٹ کے فیصلے کے خلاف سجیل سواتی ایڈووکیٹ کے ذریعے سپریم کورٹ میں اپیل دائر کی۔

لاہور ہائیکورٹ نے سپریم کورٹ کے حکم نامے کی خلاف ورزی کی، فیصلہ

اپنے فیصلے میں عدالت نے کہا کہ سپریم کورٹ عام طور پر دوسری پارٹی کو سنے بغیر حکم امتناعی جاری نہیں کرتی، لیکن چونکہ اس مقدمے میں سپریم کورٹ کے حکمنامے کی خلاف ورزی کی گئی ہے اس لیے حکم امتناعی جاری کرتے ہوئے الیکشن کمیشن کو حکم دیتے ہیں بغیر کسی تاخیر کے اپنی آئینی ذمہ داریوں پرعمل درآمد کرے۔

عدالت نے سماعت مکمل کرتے ہوئے قرار دیا کہ عمیر نیازی کی درخواست بظاہر قابل سماعت نہیں تھی اس لیے عدالت الیکشن کمیشن کو حکم دیتی ہے کہ وہ آج ہی انتخابی شیڈول جاری کرے، فیصلے میں سپریم کورٹ نے عمیر نیازی اور چاروں صوبوں اور اسلام آباد کے ایڈووکیٹ جنرلز کو بھی نوٹسز جاری کیے۔

سپریم کورٹ نے عمیر نیازی کو اظہارِ وجوہ نوٹس جاری کیا اور کہا کہ عمیر نیازی وضاحت کرے کیوں نہ اس کے خلاف توہیں عدالت کی کارروائی عمل میں لائی جائے۔

لاہور ہائیکورٹ کے فیصلے کیخلاف سپریم کورٹ میں الیکشن کمیشن کی درخواست پر جاری سماعت کے دوران چیف جسٹس آف پاکستان قاضی فائزعیسیٰ نے کہا کہ لاہور ہائیکورٹ میں درخواست جمہوریت کو ڈی ریل اور عدالتی حکم کی خلاف ورزی کی کوشش ہے، لاہور ہائی کورٹ کے جج نے یہ آرڈر جاری کر کے مس کنڈکٹ کا ارتکاب کیا ہے، سپریم کورٹ آرڈر جاری کر چکی تھی، ایسا نہیں کہ آپ گاؤن پہن کے کوئی بھی آرڈر جاری کر دیں۔

الیکشن کمیشن آف پاکستان نے پی ٹی آئی کی درخواست پر آر اوز اور ڈی آر اوز کے تربیتی سلسلے کو روکے جانے کے لاہور ہائیکورٹ کے فیصلے کے خلاف سجیل سواتی ایڈووکیٹ کے ذریعے سپریم کورٹ میں اپیل دائر کی۔

چیف جسٹس آف پاکستان، جسٹس قاضی فائز عیسیٰ کی سربر اہی میں تین رکنی بینچ میں جسٹس سردار طارق مسعود، جسٹس منصور علی شاہ شامل تھے۔ چیف جسٹس قاضی فائز عیسیٰ نے الیکشن کمیشن کی درخواست منظور کرتے ہوئے سماعت کا آغاز کیا۔

الیکشن کمیشن آف پاکستان نے عدالت سے اپیل کی کہ ریٹرننگ آفیسرز (آر اوز) اور ڈسٹرکٹ ریٹرننگ آفیسرز( ڈی آراوز) کی معطلی کے لاہور ہائیکورٹ کے فیصلے کا کالعدم قرار دیا جائے۔

چیف جسٹس آف پاکستان جسٹس قاضی فائز عیسٰی نے سماعت کے دوران الیکشن کمیشن کے وکیل سجیل سواتی سے سوال کیا کہ آپ نے الیکشن 8 فروری کو کرانے تھے، اتنی کیا جلدی ہو گئی؟

کوشش کیوں، الیکشن ہر حال میں ہوں گے، جسٹس طارق مسعود کا سیکرٹری ای سی پی کو جواب

اس پر سجیل سواتی نے کہا کہ الیکشن شیڈول جاری کرنے میں وقت بہت کم ہے، الیکشن کمیشن کی کوشش ہے کہ الیکشن مقررہ وقت پر ہی کرائے جائیں۔ اس پر جسٹس سردار طارق مسعود نے کہا کہ کوشش کیوں؟ آپ نے تو الیکشن ہر حال میں کرانے ہیں۔

سجیل سواتی نے عدالت سے کہا کہ لاہور ہائیکورٹ میں پی ٹی آئی کے عمیر نیازی نے درخواست دائر کی ہے۔ اس پر چیف جسٹس نے کہا کہ عمیر نیازی کی درخواست انفرادی ہے یا پارٹی کی جانب سے دی گئی ہے؟۔

سجیل سواتی نے کہا کہ ظاہر ہے عمیر نیازی پی ٹی آئی کے ایڈیشنل سیکرٹری جنرل ہیں اس لیے یہ درخواست بھی پارٹی کی سطح پر ہی دی گئی ہے۔

سجیل سواتی نے کہا کہ عمیر نیازی نے درخواست میں مؤقف اختیار کیا ہے کہ انتظامی عہدوں پر فائز آفیسران کی تعیناتی صاف و شفاف انتخابات پر سوالیہ نشان ہو گا اس لیے آر اوز اور ڈی آراوز کی تعیناتی کو کالعدم قرار دیا جائے۔ لاہور ہائیکورٹ میں الیکشن ایکٹ کی دفعہ 50 اور 51 چیلنج کی گئی ہے۔ سجیل سواتی نے مزید کہا کہ ڈسٹرکٹ ریٹرننگ افسران اور ریٹرننگ افسران کی فہرست حکومت دیتی ہے۔

جج صاحبان نے سوال کیا کہ لاہور ہائیکورٹ میں درخواست گزار کیا چاہتے ہیں۔ جس پر سجیل سواتی کا کہنا تھا کہ درخواست گزار چاہتے ہیں کہ ریٹرننگ افسران عدلیہ سے لیے جائیں، انتظامیہ سے نہ لیے جائیں۔ درخواست گزار کہتے ہیں کہ انتظامیہ افسران کی آر اور تعیناتی ہمیشہ کے لیے ختم کی جائے۔

سجیل سواتی نے عدالت کو بتایا کہ درخواست میں استد عا کی گئی ہے کہ الیکشن کمیشن کو عدلیہ سے آراوز لینے کی ہدایت کی جائے۔ اس پر جسٹس منصورعلی شاہ نے سوال کیا کہ یہ شق تو کبھی بھی چیلنج کی جا سکتی تھی، اس وقت ہی کیوں چیلنج کی گئی۔

سجیل سواتی نے عدالت کو بتایا کہ پی ٹی آئی نے لاہور ہائی کورٹ میں کہا کہ ہمیں آر اوز منظور نہیں کیونکہ یہ انتظامی مشینری سے ہیں اور متعصب ہیں،اس پر سردار طارق مسعود نے کہا ہے کہ’ کون ہے جو الیکشن نہیں کروانا چاہ رہا؟’ جب کہ چیف جسٹس آف پاکستان نے کہا کہ’ پھر جج صاحب خود ہی الیکشن کروا لیں؛ حیرت ہے اس طرح کے آرڈر پاس ہو رہے ہیں،۔اگر عدالتی عملے سے آر اوز لیے جائیں تو وہ کہہ دیں گے کہ یہ بھی ہمیں منظور نہیں۔

جسٹس طارق مسعود نے سجیل سواتی سے سوال کیا کہ آپ نے الیکشن عملے کی تربیت کیوں روکی؟ اس پر سجیل سواتی نے کہا کہ نوٹیفیکیشن معطل ہو گیا تھا، جس پر جسٹس طارق مسعود نے پھر کہا کہ نوٹیفیکیشن معطل ہوا تھا، تربیت کیوں معطل کی گئی۔

لاہور ہائیکورٹ کے جج نے مس کنڈکٹ کا ارتکاب کیا، چیف جسٹس

چیف جسٹس آف پاکستان نے کہا کہ ’لاہور ہائی کورٹ کے جج نے یہ آرڈر جاری کر کے مس کنڈکٹ کا ارتکاب کیا ہے، جبکہ سپریم کورٹ آرڈر جاری کر چکی تھی، ایسا نہیں کہ آپ گاؤن پہن کے کوئی بھی آرڈر جاری کر دیں، اٹارنی جنرل کیا یہ جج کا مس کنڈکٹ ہے؟

چیف جسٹس نے اپنے ریمارکس میں مزید کہا کہ ہم نے پی ٹی آئی کی درخواست پر انتخابات کا آرڈر جاری کیا تھا، یہ عمیر نیازی بھی مبینہ طور پر پی ٹی آئی کی نمائندگی کر رہا ہے۔ جب کہ یہ وہی جج ہے جس نے بجلی کے بلوں کے بارے میں آرڑر جاری کیا تھا، اس نے ہمارے آرڈر کی پروا نہیں کی۔

چیف جسٹس نے مزید کہا کہ ہم ایک ایسے شخص کو ریلیف کیوں دیں جو توہین عدالت کر رہا ہے، جس نے پورے پاکستان کو یرغمال بنا رکھا ہے، چیک کریں یہ عمیر نیازی وکیل بھی ہیں یا نہیں؟

جسٹس طارق مسعود نے کہا کہ ’اگر عدالتی عملے کی تعیناتی کو خلاف آئین قرار دے دیں تو انتخابات کا انعقاد ممکن ہی نہیں اس پر سجیل سواتی نے کہا کہ ان لوگوں کو لگتا ہے کہ ڈیڑھ ہزار بندہ ہی متعصب ہے۔

جسٹس طارق مسعود نے مزید کہا کہ اگر کسی کو آر اوزکے تعصب سے متعلق شکایت ہو تو کیا وہ الیکشن کمیشن کے پاس آ سکتا ہے؟ جس پر الیکشن کمیشن کے وکیل کا کہنا تھا کہ جی وہ آ سکتا ہے، لیکن یہ لوگ ہمارے پاس نہیں آئے۔

یہ وہی جج ہے جس نے بجلی بلوں میں ریاست کو نقصان پہنچایا؟، چیف جسٹس

اس پر جسٹس قاضی فائز عیسیٰ نے پوچھا کہ ’ لاہور ہائیکورٹ کے اسی جج نے بجلی کے بلوں والے مقدمے میں ریاست کو کتنا نقصان پہنچایا؟ اور اس معاملے میں بھی انہوں نے نیپرا کو بائی پاس کر کے آرڈر جاری کیا تھا۔ چیف جسٹس کے پوچھنے پر اٹارنی جنرل نے کہا کہ مذکورہ جج کے فیصلے سے تقریباً 5 سو ارب کا نقصان پہنچا۔

عدالت کے پوچھنے پر سیکرٹری الیکشن کمیشن عمر حمید خان نے کہا کہ الیکشن کمشنر نے انتخابی عملے کی تربیت کے بعد الیکشن شیڈول جاری کرنے کا فیصلہ کیا تھا جس پر چیف جسٹس آف پاکستان نے پوچھا کہ آپ نے پھر الیکشن شیڈول جاری کیوں نہیں کیا۔

اس پر جسٹس سردار طارق مسعود نے کہا کہ یہ کہاں لکھا ہوا ہے کہ عملے کی تربیت کے بعد الیکشن شیڈول جاری کریں گے۔ عملے کی تربیت آپ نے بلاوجہ روکی ہے، آپ تربیت تو جاری رکھتے کیا آپ بھی چاہتے ہیں کہ الیکشن نہ ہوں؟

پی ٹی آئی کی خاتون وکیل کی سرزنش

سماعت کے دوران پاکستان تحریک انصاف (پی ٹی آئی ) کی خاتون وکیل کی جانب سے عدالتی آرڈر کی ڈکٹیشن کے دوران مداخلت پرچیف جسٹس شدید برہم ہو گئے۔

چیف جسٹس نے کہا کیا آپ وکیل ہیں؟ کہاں سے پڑھ کرآئی ہیں، سپریم کورٹ آرڈرلکھوا رہی ہے اور آپ نے بیچ میں بولنا شروع کردیا، آپ کواس عدالت کی کوئی عزت نہیں، اگر دوبارہ مداخلت کی تو توہین عدالت لگا دیں گے، سب سے پچھلی نشستوں پرجا کر بیٹھیں۔ اس دوران اٹارنی جنرل بھی بول پڑے اور کہا کہ یہ سپریم کورٹ کی وکیل نہیں ہیں۔

سوموار سے انتخابی عملے کی تربیت دوبارہ شروع کر دیں گے، الیکشن کمیشن

جسٹس صاحبان کے ریمارکس کے بعد الیکشن کمیشن کے وکیل سجیل سواتی نے عدالت کو یقین دلایا کہ ہم سوموار کو انتخابی عملے کی تربیت دوبارہ شروع کر دیں گے۔

الیکشن کمیشن کے خط میں کسی ناخوشگوار صورتحال کی ذمہ داری وزارت داخلہ پر عائد کی گئی ہے (فائل فوٹو)

واضح رہے کہ سپریم کورٹ آف پاکستان میں ہنگامی سماعت سے قبل چیف جسٹس آف پاکستان اور چیف الیکشن کمشنرسلطان سکندر راجا کے درمیان ملاقات میں جسٹس سردار طارق، جسٹس اعجاز الاحسن اور اٹارنی جنرل بھی شریک رہے جب کہ اٹارنی جنرل کو بھی ہنگامی بنیادوں پر سپریم کورٹ بلایا گیا۔ چیف جسٹس قاضی فائز عیسیٰ نے سینیئر ججوں سے الیکشن کے معاملے پر مشاورت بھی کی۔

الیکشن کمیشن آف پاکستان کی جانب سے طے شدہ شیڈول کے مطابق اگر ملک بھر میں عام انتخابات 8 فروری کو ہی کروانے ہیں تو پھر اسے جمعہ یا ہفتہ کو ہی شیڈول جاری کرنا تھا۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں