قومی اسمبلی کی سابق اسپیکر ڈاکٹر فہمیدہ مرزا ٹریفک حادثے میں زخمی ہوگئیں۔ فہمیدہ مرزا پاکستان کی واحد خاتون اسپیکر قومی اسمبلی ہیں اور وہ مارچ 2008 سے جون 2013 تک اپنے عہدے پر رہیں۔
ڈاکٹر فہمیدہ کے صاحبزادے حسنین علی مرزا نے اس حادثے کی تصدیق کرتے ہوئے بتایا ہے کہ ان کی والدہ کی گاڑی کو پیچھے سے دوسری گاڑی نے ٹکر ماری جس سے وہ زخمی ہوگئیں۔
حسنین مرزا نے بتایا کہ ان کی والدہ کراچی کے ایک نجی اسپتال میں داخل کی گئی ہیں تاہم اب ان کی حالت خطرے سے باہر ہے۔
پاکستان پیپلز پارٹی کی جانب سے اسپیکر قومی اسمبلی کے فرائض انجام دینے والی ڈاکٹر فہمیدہ مرزا اب صوبہ سندھ کے گرینڈ ڈیموکریٹک الائنس میں شامل ہیں۔ ان کے شوہر ڈاکٹر ذوالفقار مرزا بھی گرینڈ ڈیموکریٹک الائنس کا حصہ ہیں۔ ڈاکٹر ذوالفقار مرزا پاکستان پیپلز پارٹی کی حکومت میں سندھ کے وزیرداخلہ بھی رہے تاہم انہوں نے جون 2011 میں اپنے عہدے سے مستعفی ہوکر پارٹی سے راہیں جدا کرلی تھیں۔
