محکمہ سیاحت خیبر پختونخوا نے سال 2023 میں سیاحوں کی آمد سے متعلق رپورٹ جاری کردی جس کے مطابق رواں سال 1 کروڑ 69 لاکھ، 88 ہزار 946 سیاحوں نے خیبرپختونخوا کے سیاحتی مقامات کا رخ کیا۔
محکمہ سیاحت خیبر پختونخوا کی جانب سے جاری رپورٹ کے مطابق ورلڈ بینک کے کائیٹ پراجیکٹ کے زیرنگرانی 1422 کال سینٹر نے سیاحوں کی آمد سے متعلق ڈیٹا جمع کیا ہے۔
رپورٹ کے مطابق یکم جنوری سے 26 دسمبر 2023 تک 1 کروڑ 69 لاکھ، 88 ہزار 946 سیاحوں نے صوبے کا رخ کیا جن میں غیر ملکی سیاحوں کی تعداد 4 ہزار 554 رہی۔ سب سے زیادہ سیاح گلیات گئے جن کی تعداد جنوری سے دسمبر تک 63 لاکھ، 48 ہزار ریکارڈ کی گئی۔
رپورٹ کے مطابق وادی ناران کاغان میں 50 لاکھ 80 ہزار، مالم جبہ میں 35 لاکھ 49ہزار سے زیادہ جبکہ دیر اپر اور دیر لوئر میں ایک سال کے دوران 13 لاکھ 80 ہزار 740 سیاح سیرو تفریح کے لیے گئے۔
چترال لوئر میں 5 لاکھ91 ہزار 330 جبکہ اپر چترال میں 38 ہزار 771 سیاحوں کی آمد ہوئی جن میں غیر ملکی سیاح 1 ہزار 624 چترال لوئر گئے۔ چترال اپر میں 791، دیر اپر اور لوئر میں 417، گلیات میں 237، مالم جبہ میں 588 جبکہ ناران کاغان میں 897 غیر ملکی سیاح آئے۔
