امریکا میں مسلمانوں کی فلاحی تنظیم زکوٰۃ فاؤنڈیشن آف امریکا نے پاکستان میں آپریشن کا آغاز کرتے ہوئے سیلاب سے متاثرہ ہندو خاندانوں کے لیے گھروں کی تعمیر شروع کر دی ہے۔
وی نیوز کے ساتھ ایک انٹرویو میں زکوٰۃ فاؤنڈیشن آف امریکا کے ایڈوائزر فرخ رضا نے بتایا کہ سندھ میں سیلاب سے متاثرہ 25 ہندو خاندانوں کو گھروں کی چابیاں دی جا چکی ہیں جبکہ 150 کے قریب گھروں کی تعمیر کا کام جاری ہے۔
ان کا کہنا تھا کہ زکوٰۃ فاؤنڈیشن امریکا سمیت دنیا کے 50 سے زیادہ ممالک میں فلاحی کام کرتی ہے اور 6 ماہ قبل پاکستان میں بھی بطور انٹرنیشنل این جی او رجسٹرڈ ہو چکی ہے۔
Related Posts
ان کا کہنا تھا کہ گزشتہ سال سیلاب میں سندھ کے ضلع میرپور کی تحصیل جھڈو میں ہندوؤں کی پوری بستی بہہ گئی تھی جس کے بعد زکوٰۃ فاؤنڈیشن نے پہلے انہیں خوراک اور ابتدائی مدد فراہم کی اور اس کے بعد ان کے لیے پکے گھر بنانے کا بیڑا اٹھایا۔ اس سلسلے میں 150 خاندانوں کو گھر بنا کر دیے جائیں گے۔ پہلے مرحلے میں 25 گھروں کی تعمیر بھی ہو چکی اور وہ متاثرین کے حوالے بھی کر دیے گئے ہیں۔
انہوں نے کہا، ’ہمارے منشور میں ہے کہ فلاحی کام میں رنگ، نسل اور مذہب کا امتیاز نہیں رکھیں گے‘۔
فاؤنڈیشن نے اسلام آباد میں اپنا دفتر قائم کر لیا ہے، فرخ رضا
فرخ رضا نے بتایا کہ پاکستان میں ان کی فاؤنڈیشن نے 2005 کے زلزلے میں مقامی تنظیموں کے ذریعے مدد پہنچائی تھی۔ اب فاؤنڈیشن نے اسلام آباد میں اپنا دفتر قائم کر لیا ہے۔
’ہم لاہور میں 10 ملین ڈالر کی لاگت سے 100 بیڈز کا ایک جدید اسپتال قائم کر رہے ہیں جو مریضوں کو مفت سہولیات فراہم کرے گا جس میں خاص طور پر دل کے مریضوں کو جدید سہولیات مہیا کی جائیں گی‘۔
اسلام کا مثبت تشخص اجاگر کرنے کی کوشش کر رہے ہیں، ایڈوائزر زکوٰۃ فاؤنڈیشن
ان کا کہنا تھا کہ رائیونڈ روڈ پر قائم اس اسپتال میں روبوٹکس اور جدید ٹیکنالوجی بھی لائی جائے گی اور رواں برس رمضان میں اس پر کام بھی شروع ہو جائے گا۔
ایک سوال کے جواب میں انہوں نے کہا کہ وہ زکوٰۃ فاؤنڈیشن کے کام سے اسلام کا مثبت تشخص اجاگر کرنے کی کوشش کر رہے ہیں۔
فرخ رضا نے مزید بتایا کہ ان کی فاؤنڈیشن غزہ میں فلسطینی مسلمانوں کی مدد کرنے کے لیے مسلسل کام کر رہی ہے اور اکتوبر سے اب تک لاکھوں لوگوں کو خوراک پہنچائی جا چکی ہے جبکہ کینسر کے شکار درجنوں فلسطینی بچوں کی کفالت بھی کی جا رہی ہے۔
