تحریک انصاف کی جانب سے اپنے سابق اتحادی اور سربراہ عوامی مسلم لیگ شیخ رشید احمد کے مد مقابل امیدوار کھڑا کرنے کے فیصلے کے ردعمل میں راولپنڈی میں ان کی رہائش گاہ لال حویلی سے عمران خان کی تصویر والے پوسٹرز غائب ہوگئے ہیں۔
سابق وزیر داخلہ شیخ رشید احمد کو 8 فروری کو ہونے والے آئندہ 2024 کے عام انتخابات کے لیے پی ٹی آئی کا ٹکٹ نہیں دیا گیا، نتیجتاً، لال حویلی – شیخ رشید کے سیاسی مرکز اور رہائش گاہ سے عمران خان کی تصاویر اتار دی گئیں۔
پی ٹی آئی نے راولپنڈی کے حلقہ این اے 56 اور این اے 57 میں عوامی مسلم لیگ کے سربراہ شیخ رشید کے مقابلے میں دو مختلف امیدواروں کو میدان میں اتارا ہے۔
ذرائع نے انکشاف کیا ہے کہ تحریک انصاف کی جانب سے شیخ رشید کے خلاف امیدوار بننے کے اعلان کے بعد لال حویلی سے پی ٹی آئی کے جھنڈے اورعمران خان کی تصاویر ہٹا دی گئیں۔
میڈیا رپورٹس کے مطابق عوامی مسلم لیگ کے سربراہ کی رہائش گاہ کے باہر سیڑھیوں اور میٹنگ روم میں عمران خان کی تنہا اور شیخ رشید کے ساتھ آویزاں کئی تصاویر ہٹا دی گئی ہیں، یہ تصاویر جو کئی برسوں تک لال حویلی کا حصہ تھیں حالیہ سیاسی پیش رفت کے بعد اتاری گئی ہیں۔
