الیکشن کمیشن آف پاکستان نے الیکشن ایکٹ کے تحت سیاسی جماعتوں سے 5 فیصد خواتین امیدواروں کی فہرست طلب کر لی۔
ترجمان الیکشن کمیشن کے مطابق الیکشن ایکٹ 2017 کی سیکشن 206 کے تحت جنرل نشستوں پر خواتین امیدواروں کی 5 فیصد نمائندگی کو یقینی بنانا لازمی ہے۔
مزید پڑھیں
ترجمان کے مطابق الیکشن کمیشن نے تمام سیاسی جماعتوں سے درخواست کی ہے کہ 5 روز کے اندر جنرل نشستوں پر مرد اور خواتین امیدواروں (جنہیں پارٹی ٹکٹ جاری کیے گئے ہیں) کی فہرست الیکشن کمیشن کے پاس جمع کرا دیں۔
واضح رہے کہ الیکشن کمیشن آف پاکستان نے تمام سیاسی جماعتوں اور آزاد امیدواروں کو انتخابی نشانات الاٹ کر دیے ہیں۔
الیکشن کمیشن کی جانب سے جاری شیڈول کے مطابق ملک بھر میں عام انتخابات کے لیے پولنگ 8 فروری کو ہونی ہے۔ انتخابی نشانات کی الاٹمنٹ کے بعد اب بیلٹ پیپرز کی چھپائی کا مرحلہ شروع ہوگا۔
